Փաստ ինֆո

Երեկոյան, երբ ադրբեջանցիների այսօրվա ձախողման մասին տեղեկությունները լինեն, հասարակության մոտ ավելի մեծ դժգոհություն կարող է առաջացնել, ինչի համար էլ օրվա ընթացքում նրանք փորձելու են ինչ-որ գործողություններ անել, այդ թվում նաև քաղաքացիական բնակչությանը թիրախավորել։ «Փաստինֆո»-ի հետ զրույցում այս մասին ասաց ադրբեջանագետ Տարոն Հովհաննիսյանը։

Վերջինս նկատեց՝ օրվա ընթացքում փորձելու են ինչ-որ բան անել, սակայն իրենց ամեն ձախողման հետ ներքին հուզումներն ավելանալու են. «Հույս ունեն, որ կկարողանան իրենց տեսանկյունից որոշակի ձեռքբերում ունենալ, որով կկարողանան մեղմել իրավիճակը։ Այս քանի օրն այդ տրամաբանությամբ են գործում, բայց անընդհատ ավելի մեծ են իրենց ձախողումները։ Ըստ այդմ՝ փորձում են հնարավոր բոլոր տարբերակներն օգտագործել՝ խախտելով անգամ միջազգային իրավունքի բոլոր դրույթները»,-ասաց ադրբեջանագետը՝ ընդգծելով, որ եթե Ադրբեջանը թեկուզ որևէ թեթև հաջողություն չգրանցի, ապա իրենց մոտ ներքաղաքական իրավիճակը կարող է ավելի բարդանալ։

Տարոն Հովհաննիսյանը նկատեց՝ Ադրբեջանի նախագահը երեկ մի շարք խնդրահարույց հայտարարություններ իրականացրեց գրեթե բոլոր խնդիրների համար մեղադրելով արտգործնախարարին, չնայած նրան, որ այս պահին խնդիրների 90 տոկոսը ռազմական ճակատում են, այլ ոչ թե դիվատանագիտականում. «Չցանկանալով ընդունել և իր վրա վերցնել առայժմ փաստացի ձախողումների պատասխանատվությունը, Ալիևը որոշեց ողջ պատասխանատվությունը գցել դիվանագետների վրա՝ ի դեմս հենց Մամեդյարովի, որին ինքն է բերել արտգործնախարարի պաշտոնին։ Իր արտաքին քաղաքականությունը 16 տարուց ավել այդ մարդու հետ էր կառուցում, սակայն այժմ նշում է, որ 16 տարի Մամեդյարովը սխալ է աշխատել։ Նա գնում է այդ ռիսկին, որը նշանակում է, որ ինքն էլ է սխալ աշխատել, սակայն այդ խնդիրնենն ուղղում է դեպի Մամեդյարով»,-ասաց ադրբեջանագետը։ Չնայած այս պահի դրությամբ Ադրբեջանի հիմնական ձախողումները ռազմական բնույթի են, այնուամենայնիվ ադրբեջանագետը կարծում է, որ Ալիևը չէր կարող թիրախավորել պաշտպանության նախարարին։ Եթե նա որևէ կերպ թիրախավորեր պաշտպանության նախարարին կամ բանակից այլ բարձրաստիճան պաշտոնյայի, ապա դրանով ընդունած կլիներ իր պարտությունը. «Եթե աշխատանքից ազատեր պաշտպանության նախարարին, նշանակում է՝ կընդուներ, որ Ադրբեջանը պարտություն է կրում։ Այդ պատճառով էլ որոշեց բողոքի ալիքն ուղղորդել դեպի Մամեդյարով։ Չնայած ԵԱՀԿ Մինսկի համանախագահների կոչին, Ալիևը որոշեց գնալ նոր դիվերսիայի փորձի՝ հուսալով, որ այդպես կարող է թեկուզ մի փոքր ռազմական առավելություն ստանալ և այդ առավելության միջոցով չեզոքացնել իր ձախողումները, բայց փաստացի ադրբեջանական զինուժը բավականին լուրջ վնաս կրեց»,-ասաց Տարոն Հովհաննիսյանը։

Նրա խոսքով այս պահին առկա տեղեկություններով միջդիրքային տարածությունում թշնամին ունի առնվազն 10 դիակ և թե քանիսն էլ սպանվել ու իրենք կարողացել են իրենց հետ տանել, Տարոն Հովհաննիսյանը դժվարացավ ասել։

Ադրբեջանագետն ասաց, որ այս պահին Ալիևի գործողությունները փակուղային իրավիճակում հայտնված մարդու գործողություններ են, քանի որ նա բնակչության դժգոհությունները ցրելու համար ստիպված եղավ մի քանի խնդրահարույց հայտարարություն կատարել. «Բացի Մամեդյարովից նաև ընդունել է, որ ընդամենը 150 մարդ է պատրաստակամություն հայտնել զինվորական կոմիսարիատներում ռազմական գործողություններին մասնակցելու, իսկ մնացածն ուղղակի հայտարարում են։ Դա նշանակում է, որ երկրի ներսում փաստացի գործողությունների մասով ցանկություն ունեցողները շատ քիչ են աջակցելու, իսկ խոսելն, ըստ էության, դատարկ բան է։ Ալիևը խախտեց բոլոր ձեռք բերված պայմանավորվածությունները, ԵԱՀԿ-ի հայտարարությունից հետո գնաց ակնհայտ դիվիրսիայի և ռազմական գործողության, այսինքն` արհամարհեց ԵԱՀԿ Մինսկի խմբի հայտարարությունը, և սա բավականին թանկ է նստելու իր վրա։ Սա գին ունի, սակայն ինքը հաշվարկեց իշխանությունը պահելու ռիսկերը և որոշեց, որ իր համար ավելի գերադասելի է վճարել այդ գինը՝ փորձելով անգամ քաղաքացիական բնակչության թիրախավորմամբ որոշակի դիվիդենտներ քաղել»,-նշեց Տարոն Հովհաննիսյանը։

Աղբյուր` Փաստինֆո