Փաստ ինֆո

Հայրենիք-պետություն ունենալը պատասխանատվություն է, պատասխանատվություն, որն ընկած է ժողովրդի, հանրության ուսերին։ Այս մասին «Եռաբլուրում» ասել է վարչապետ Նիկոլ Փաշինյանը։

«Ընդհանրական այս պատասխանատվությունը, սակայն, կարող է դառնալ անպատասխանատվություն, եթե մենք այն թողնենք միայն «ժողովուրդ», «հանրություն» հավաքական հասկացությունների մեջ ցրված, լղոզված, եթե իվիճակի չլինենք այդ պատասխանատվությունը բաղդատել, կոնկրետ ու հասցեական դարձնել ժողովուրդ կամ հանրություն հավաքականույթւոնը ձևավորող սուբյեկտների, այսինքն՝ անհատների միջև, մեզնից յուրաքանչյուրի միջև»,- ասաց վարչապետը։

Նա նշեց, որ այստեղ հավաքվել են ազդարարելու, որ ՀՀ ԶՈՒ մայոր, ՀՀ քաղաքացի Գարուշ Համբարձումյանը, ՀՀ ԶՈՒ կապիտան, ՀՀ քաղաքացի Սոս Էլբակյանը, ՀՀ ԶՈՒ կրտսեր սերժանտ, Սմբատ Գաբրիելյանը, ՀՀ ԶՈՒ կրտսեր սերժանտ, ՀՀ քաղաքացի Գրիշա Մաթևոսյանը, լիարժեք և անմնացորդ կրեցին հայրենիք-պետություն ունենալու իրենց բաժին պատասխանատվությունը։

«Նրանք այդ պատասխանատվության զոհասեղանին դրեցին իրենց կյանքը ու ոչ միայն իրենց, այլև իրենց ընտանիքների, հարազատների կյանքը, որովհետև նրանց կյանքն առաջվանը չի լիելու, նրանք ապրելու են խեղդող բացակայության հետ», - նշեց Նիկոլ Փաշինյանը՝ ընդգծելով, որ նրանք լիարժեք կրել են իրենց պատասխանատվությունը՝ Աստծո առաջ, հայրենիք-պետության առաջ, մեր նահատակների ու սերունդների առաջ, Եռաբլուրի և Ծիծեռնակաբերդի առաջ և այժմ մեր՝ ապրողներիս պատասխանատվության ժամն է, մեր հավաքական և յուրաքանչյուրիս պատասխանատվության ժամն է։

Աղբյուր` Փաստինֆո