Փաստ ինֆո

Այս բերափոխումների արդյունքում ունենալու ենք աշխարհում ամենաառաջադեմ հայտարարագրման համակարգը, որը կոռուպցիայի կանխարգելման տեսանկյունից մեծ կարևորություն է ունենալու։ Այս մասին կառավարության նիստին «Հանրային ծառայության մասին» օրենքում և հարակից օրենքներում փոփոխություններ և լրացումներ կատարելու մասին օրենքների նախագծերի փաթեթի քննարկման ժամանակ ասաց ՀՀ արդարադատության նախարար Ռուստամ Բադասյանը։

Ռուստամ Բադասյանը ներկայացրեց նախագծով առաջարկվող հիմնական կարգավորումները. «Հայտարարատուի ֆինանսական շարժի վերաբերյալ ամբողջական պատկերացում կազմելու նպատակով առաջարկվել է ներդնել նոր ծախսերի հայտարարագրման ինստիտուտ։ Ծախսերի հայտարարագրման տեսանկյունից նախագծով որդեգրվել է հետևյալ մոտեցումը. որոշակի կոնկրետ ծախսերի դեպքում, որոնք սպառիչ թվարկված են նախագծով, անձը պարտականություն է կրում այն հայտարարգրելու, եթե այդպիսի ծախսի միանվագ արժեքը գերազանցում է 1 մլն դրամը կամ դրան համարժեք արտարժույթը։ Նախագծով նաև սահմանվել է դրույթ առ այն, որ հայտարարգրման է ենթակա նաև ցանկացած այլ ծախս, եթե դրա միանվագ արժեքը գերազանցում է 2 մլն դրամը կամ դրան համարժեք արժույթը։ Նախագծով առաջարկվում է հայտարարագրման ենթակա գույք սահմանել նաև հայտարարատուի կողմից փաստացի տիրապետվող գույքը։ Նախագծով փաստացի տիրապետվող գույք է համարվում հայտարարատուին սեփականության իրավունքով չպատկանող, բայց վերջինիս կողմից վերահսկվող գույքը»,-նշեց Ռուստամ Բադասյանը։

ՀՀ վարչապետ Նիկոլ Փաշինյանը նկատեց, որ մինչև հիմա պետական պաշտոնյաները հայտարարագրում էին իրենց եկամուտները, ինչը լավ է, բայց ամբողջական չէ. «Առաջարկի կարևոր նորամուծություններից մեկն այն է, որ պետական պաշտոնյաները պետք է հայտարարագրեն նաև իրենց ծախսերը։ Ընդ որում ոչ բոլոր ծախսերը, շեմեր են դրվել տարբեր ուղղություններով և այդ շեմերից բարձր ծախսերն են, որ պետք է հայտարարագրվեն, որի արդյունքում Կոռուպցիայի կանխարգելման հանձնաժողովը հնարավորություն կունենա համեմատել հայտարարգված եկամուտները և ծախսերը»,-հավելեց վարչապետը։

Աղբյուր` Փաստինֆո