Փաստ ինֆո

ՀՀ երկրորդ նախագահ Ռոբերտ Քոչարյանի պաշտպանական թիմի անդամ Հայկ Ալումյանը վճռաբեկ բողոք է ներկայացրել՝ Ռոբերտ Քոչարյանի նկատմամբ որպես խափանման միջոց գրավը կիրառելու մասին Վերաքննիչ քրեական դատարանի որոշման դեմ։ «Դատալեքս» դատական տեղեկատվական համակարգից տեղեկանում ենք, որ պաշտպանական կողմի ներկայացրած վճռաբեկ բողոքը դատարան մուտք է եղել հուլիսի 13-ին։ Պաշտպան Հայկ Ալումյանը «Փաստինֆո»-ի հետ զրույցում ասաց, որ Ռոբերտ Քոչարյանի նկատմամբ որևէ տեսակի խափանման միջոց կիրառելու հիմք գոյություն չունի։ Նրա խոսքով՝ որևէ տեսակի խափանման միջոց կարող է կիրառվել, եթե կա հավանականություն, ընդ որում՝ քրեական գործի նյութերով հաստատված հավանականություն, որ անձը կարող է խոչընդոտել քննությանը, կարող է թաքնվել քննությունից կամ հանցանք գործել։ 

«Հանցանք գործելու մասին անգամ դատախազությունը չի նշում, այսինքն՝ այդ հավանականությունն ընդհանրապես չի էլ քննարկվում, առաջին ատյանի դատարանը գտել է, որ չկա հավանականություն, որ պարոն Քոչարյանը կարող է թաքնվել քննությունից»,- ասաց Ալումյանը՝ հավելելով, որ Վերաքննիչ քրեական դատարանում քննարկման առարկա էր միայն հետևյալը՝ կա հավանականություն, որ պարոն Քոչարյանը կարող է խոչընդոտել քննությանը և, եթե կա, ապա ինչ խափանման միջոցի կիրառմամբ այդ հավանականությունը կարող է զսպվել։

Պաշտպանական կողմը գտնում է, որ չկա հավանականություն, որ Ռոբերտ Քոչարյանը կարող է խոչընդոտել գործի քննությանը։ Բացի այդ՝ Ալումյանը նաև հիշեցրեց, որ 2018թ օգոստոսի 13-ին Ռոբերտ Քոչարյանն ազատ էր արձակվել՝ առանց որևէ խափանման միջոցի, ընդ որում՝ դա եղել է նախաքննության ամենաակտիվ փուլում։

Այդ ընթացքում, առանց որևէ խափանման միջոցի ազատ արձակվելով, ըստ փաստաբանի, նա չի դրսևորել այնպիսի վարքագիծ, որ որևէ մեկին հիմք կտար ենթադրելու, որ ինքը կարող է խոչընդոտել քննությանը։ Ալումյանը նաև հիշեցրեց այն հանգամանքը, որ Ռոբերտ Քոչարյանը վերադարձել է ՀՀ՝ իմանալով հանդերձ, որ այստեղ քննվում է այդ գործը։ Ալումյանը նշեց, որ անհամաձայնություն կա նաև ընտրված խափանման միջոցի հետ, մասնավորապես՝ Վերաքննիչ դատարանը գտել էր, որ կա խոչընդոտելու հավանականություն, ինչի հետ պաշտպանական կողմը կտրականապես համաձայն չէ, բայց այդուհանդերձ, եթե դատարանը գտել է, որ կա խոչընդոտելու հավանականություն, ապա ինչու՞ չպետք է Ռոբերտ Քոչարյանն ազատ արձակվեր անձնական երաշխավորությամբ։ Վիճարկվել է նաև գրավի աննախադեպ գումարի չափը, սակայն, Ալումյանն ընդգծեց, որ դա ներկայացվել է որպես երրորդ փաստարկ՝ նաև իր նշանակության տեսանկյունից։

Ինչպես արդեն տեղեկացրել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, մասնակի բեկանել է Երևանի ընդհանուր իրավասության դատարանի որոշումը եւ Ռոբերտ Քոչարյանի նկատմամբ որպես խափանման միջոց սահմանել գրավը՝ 2 մլրդ ՀՀ դրամի չափով։ Գումարը վճարվել է եւ նրա խափանման միջոցը փոխվել է։

Հեղինակ՝ Իզաբել Սահակյան

Աղբյուր` Փաստինֆո