Փաստ ինֆո

Երևանի ընդհանուր իրավասության դատարանի դատավոր Լիզա Գրիգորյանի նախագահությամբ, այսօր հետաձգվեց «Մարտի 1»-ի գործով տուժողների իրավահաջորդներն ընդդեմ «Զինվոր» ՀԿ համակարգող խորհրդի նախագահ Մարգարիտա Խաչատրյանի գործով դատական նիստը։

«Փաստինֆո»-ի թղթակցի հաղորդմամբ՝ դատական նիստին ներկայացել էր պատասխանող կողմը՝ Մարգարիտա Խաչատրյանը, Սաթիկ Խլղաթյանը և նրանց ներկայացուցիչ փաստաբան Ալեքսանդր Կոչուբաևը։ Իսկ հայցվոր կողմը՝ «Մարտի 1»-ի գործով տուժողները չէին ներկայացել նիստին։ Դատարանն արձանագրեց, որ հայցվոր կողմը պատշաճ ծանուցված է եղել դատական նիստի օրվա վերաբերյալ, բայց նրանց փաստաբան Տիգրան Եգորյանը դիմում էր ներկայացրել դատարան՝ խնդրելով հետաձգել դատական նիստը, քանի որ վերջինիս ներկայությունն անհնար է՝ ծանրաբեռնվածության պատճառով։ Դատարանը մերժեց Եգորյանի միջնորդությունը՝ արձանագրելով, որ հայցվոր կողմը պատշաճ ծանուցված եղել է և չի նշել, թե ինչ ծանրաբեռնվածության մասին է խոսքը։

Նախագահող դատավոր Գրիգորյանը հստակեցրեց՝ արդյո՞ք կողմերն ունեն ինքնաբացարկի միջնորդություն, սակայն պատասխանող կողմը հայտարարեց, որ ինքնաբացարկի հիմքեր չեն տեսնում եւ ներկայացրեցին իրենց առարկությունները։ Փաստաբան Կոչուբաևը նշեց, որ հայտարարությունները չեն կարող համարվել զրպարտանք, եթե դրանք ամրագրված են որևէ իրավական ակտում, մասնավորապես՝ Կոչուբաևը հիշեցրեց 2008թ մարտի իրադարձությունների վերաբերյալ Նիկոլ Փաշինյանին առաջադրված մեղադրանքը, որտեղ ամրագրված էր, որ եղել են անկարգություններ։

Փաստաբանը նշեց, որ քաղաքացիական օրենսդրության համաձայն՝ Սարգիս Քլոյանը և մյուսները չեն կարող սույն գործով լինել որպես տուժողի ներկայացուցիչ։ Բացի այդ՝ Կոչուբաևը նշեց, որ առկա է նաև հայցային վաղեմության խնդիր եւ դիմում ներկայացրեց՝ խնդրելով կիրառել հայցային վաղեմություն։ Դատարանն էլ արձանագրեց, որ պետք է քննարկվի հայցային վաղեմության կիրառման խնդիրը և ապացուցման բեռի բաշխումը, սակայն դիմումի օրինակը պատասխանող կողմը չի ներկայացրել հայցվոր կողմին։ Դատարանը հետաձգեց հայցի քննությունը, քանի որ հայցվոր կողմը պետք է ծանոթանա դիմումին։

Հաջորդ դատական նիստը նշանակվել է օգոստոսի 19-ին։

Ավելի վաղ հայտնել ենք, որ «Մարտի 1»-ի գործով տուժողների իրավահաջորդները դատական հայց են ներկայացրել՝ ընդդեմ Մարգարիտա Խաչատրյանի և Սաթենիկ Խլղաթյանի՝ զրպարտության և վիրավորանքի համար։ Մասնավորապես՝ հայցի պատճառ է դարձել Մարգարիտա Խաչատրյանի այն հայտարարությունը, որով նա հայտարարել էր, որ կառավարությունը 30 մլն դրամ է տրամադրում «Մարտի 1»-ի իրադարձությունների ժամանակ խանութներ թալանին և անկարգությունների մասնակիցներին, իսկ հայրենիքի սահմանները պաշտպանող զոհված զինծառայողների հարազատներին՝ ոչ։

Հեղինակ՝ Իզաբել Սահակյան

Աղբյուր` Փաստինֆո