Փաստ ինֆո

Ընդդիմությունը նախկինում դեմ է եղել գրավոր քվեարկությանը։ Այս մասին այսօր հայտարարեց Էդմոն Մարուքյանը՝ անդրադառնալով «Իմ քայլը» խմբակցության մի քանի պատգամավորների մշակած օրինագծին, որով առաջարկվում է ներդնել առողջության հիմքով ժամանակավորապես անաշխատունակ ճանաչված պատգամավորների գրավոր քվեարկության կարգը։ Էդմոն Մարուքյանը հիշեցրեց, որ «Ելք» խմբակցությունում, որի անդամ է եղել Նիկոլ Փաշինյանը, կար սկզբունք՝ չօգտվել այդ մեխանիզմից և երբևէ ծրար չեն թողնել։

« Երբ նոր կանոնակարգը ընդունվել էր, այս կանոնակարգը՝ Հրայր Թովմասյանի և Հանրապետական կուսակցության մի շարք գործիչների հեղինակությամբ, ընդդիմությունը դեմ էր այս ծրարով քվեարկելուն։ Փաստարկները հետևյալն են՝ որ քննարկմանը չի մասնակցում, պարզ չի ինչ է մտածում մարդը, և սա հանրապետականներն անում են, որ ընդհանրապես չգան գործի՝ ծրարներ ուղարկեն և նիստերը վարեն։ «Ելք» խմբակցությունում կար սկզբունք՝ չօգտվել այդ մեխանիզմից և երբևէ ծրար չթողնել։ Հետո եկան իշխանությունները և դա դարձավ լեգիտիմ գործիք և դա քիչ չէ, հիմա եկել ասում եք, քանի որ նորմալ է, որ գործուղման գնացած մարդը ուղարկում է ծրար, հիմա էլ անաշխատունակության հետ կապված էլի ծրար ուղարկի»,- ասաց նա ու ավելացրեց. «ժողովուրդ կարողա մոռանում ենք որ խորհրդարանական երկիր է։ Այս դահլիճում, օրինակ՝ կարող է մեկ ժամից երկրի ղեկավար փոխվի։ Ո՞նց եք պատկերացնում պատգամավորին չտեսնե՞նք, տանը ի՞նչ իմանանք՝ զենք են դրել պատգամավորի գլխին, ի՞նչ է ստորագրել»։

«Սա աբսուրդ բան է վերցրեք հետ տարեք։ Դուք ձեր իշխանության տակ ռումբ եք դնում այս նախագծով»,- հայտարարեց նա։

Էդմոն Մարուքյանը նշեց, որ դեմ են և կորոնավիրուսի ժամանակ, և ընդհանրապես այս մեխանիզմները կիրառելուն։

Աղբյուր` Փաստինֆո