Փաստ ինֆո

ՀՅԴ Հայաստանի երիտասարդական միությունն այսօր բողոքի ակցիա էր կազմակերպել Երևանում Ուկրաինայի դեսպանատան դիմաց՝ արտահայտելով իրենց դժգոհությունը հայ-ադրբեջանական սահմանին տեղի ունեցածի վերաբերյալ Ուկրաինայի ԱԳՆ-ի հայտարարության դեմ։

«Արդեն մի քանի օր է, ինչ Ադրբեջանը պատերազմ է հայտարարել Հայաստանին և յակ-ադրբեջանական սահմանին տեղի են ունենում բախումներ։ Այս առիթով տարբեր պետությունների, միջազգային կազմակերպությունների կողմից եղան հայտարարություններ։ Ուկրաինան տարածեց մի հայտարարություն, որը տարածաշրջանում սրում է կոնֆլիկտը։ Ուկրաինայի տարածած հայտարարությունը ջուր է լցնում մարդասպան Ադրբեջանի ջրաղացին և միակողմանի հայտարարություն էր՝ ի օգուտ ագրեսոր Ադրբեջանի։ Մենք ասում ենք, որ դուք սեպ եք խրում Հայաստանի և Ուկրաինայի հարաբերությունների մեջ։ Բոլորիս պարզ է դրա պատճառը։ Դրա հետևում կանգնած են մեծ ֆինանսներ, տարբեր շարժառիթներ, սակայն դա մեզ չի հետաքրքրում։ Եկել ենք ձեզ փոխանցենք «ձեր եփած բորշչը»։ Կերեք այդ «բորշչը» և սուս մնացեք»,-նշեց ակցիա իրականացնող երիտասարդներից մեկը։

Բողոքի ակցիա իրականացնողները վանկարկում էին «Ուկրաինա մի՛ սադրիր», «Մի՛ աջակցեք ագրեսորին»։ Երիտասարդները նշեցին, որ Ուկրաինայի հայտարարությանն ի պատասխան իրենց այս գործողությունը շատ մեղմ է. «Կոչ ենք անում ՀՀ-ում Ուկրաինայի դեսպանին, որ փոխանցեն Ուկրաինայի իշխանություններին, որ չխառնվեն։ Ձեր բիզնես շահերը և ձեր կապերն Ադրբեջանի հետ մի՛ քաղաքականացրեք և մի՛ խառնվեք այս կոնֆլիկտին։ Ջուր մի՛ լցրեք ագրեսորի ջրաղացին»,-նշեց ՀՅԴ երիտասարդական միության անդամը։

Աղբյուր` Փաստինֆո