Փաստ ինֆո

Յուրաքանչյուր երկիր իր շահերն ունի և մենք պետք է մեր խնդիրները լուծենք՝ անկախ նրանից, թե ինչպիսի միջազգային արձագանքներ կան։ Այս մասին այսօր ԱԺ-ում լրագրողների հետ զրույցի ժամանակ ասաց «Իմ քայլը» խմբակցության պատգամավոր Շիրակ Թորոսյանը՝ անդրադառնալով հայ-ադրբեջանական սահմանի իրադարձությունների վերաբերյալ միջազգային արձագանքին։ 

«Միջազգային արձագանքները եղել են կա՛մ չեզոք, կա՛մ հօգուտ Հայաստանի, բացառությամբ երկու դեպքի։ Դա Թուրքիան էր, որը խիստ կողմնակալ դիրքորոշում է արտահայտել։ Սա ևս մեկ անգամ ցույց է տալիս, որ Թուրքիան իրավունք չունի պարզապես ներգրավվելու ԵԱՀԿ շրջանակներում Արցախյան հակամարտության լուծման գործընթացի մեջ, որովհետև խիստ սևեռված և ադրբեջանամետ դիրքորոշում ունի։ Մենք ունենք նաև Ուկրաինայի տարբերակը, որի հայտարարությունը մեղմ ասած չէր բխում արդարության ոգուց և Արցախյան հակամարտության լուծման տրամաբանական ոգուց։ Մնացած բոլոր դեպքերում և՛ միջազգային կառույցները, և՛ առանձին պառլամենտներն ու առանձին պառլամենտականները կա՛մ եղել են չեզոք, կա՛մ արդարության ոգուն համապատասխան»,-ասաց պատգամավորը։

Հարցին՝ այս պահին մեր երկրի քայլերը բավարար է համարում միջազգային կառույցների հետ աշխատանքի առումով, պատգամավորն ասաց, որ առաջին իսկ պահից ակտիվորեն աշխատանք է տարվել միջազգային կառույցների հետ ԱԳՆ-ի և այլ օղակների մակարդակով. «Մեր դիրքորոշումը և մեր կողմից ներկայացված ազնիվ և արդար տեսակետները ներկայացրել ենք հայ-ադրբեջանական սահմանի էսկալացիայի հետ կապված։ Աշխարհն այսօր այդ մասին հստակ տեղեկացված է և ԱՄՆ-ի կոնգրեսականների, սենատորների, Իտալիայի սենատորների արձագանքներն այն մասին են խոսում, որ մարդիկ շատ հստակ հայանպաստ դիրքորոշում են արտահայտել»,-ասաց Շիրակ Թորոսյանը։

Ինչ վերաբերում է Բաքվում տեղի ունեցած ցույցերին, Շիրակ Թորոսյանը նկատեց՝ Ադրբեջանի իշխանության ձեռագիրն այստեղ տեսնում է.

«Այսօր ոչ մի միամիտ չի հավատա, որ Բաքվում զանգվածային ցույց լինի և ցուցարարներին չարգելափակեն, չարգելեն այդ շարժումները, եթե դա մեղմ ասած թույլատրված չէ իշխանությունների կողմից։ Դա պատերազմական հռետորաբանության հերթական դրսևորումն է։ Ցանկացած ռազմական գործողություն հղի է Ադրբեջանի համար կորստաբեր հետևանքներով։ Նրանք կորցնելու են և ավելի մեծաքանակ զինտեխնիկա և հավանական է, որ կկորցնեն տարածքներ։ Թող իրենք որոշեն՝ ինչի կգնա իշխանությունը։ Կգնա էսկալացիայի, թե՞ կմնա Մինսկի խմբի տրամաբանության մեջ»,-նշեց Շիրակ Թորոսյանը։

Աղբյուր` Փաստինֆո