Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը։ Դատական նիստի մեկնարկից առաջ իրավիճակը մի փոքր լարված էր, քանի որ տուժող կողմի իրավահաջորդները չէին ցանկանում նստել դահլիճի մյուս հատվածում՝ նշելով, որ իրենց համար անհասկանալի է, թե ինչու դատավարության մյուս մասնակիցները պետք է նստեն իրենց տեղում, իսկ տուժողները՝ ապակուց այն կողմ։ Դատական նիստի մեկնարկին տուժող կողմի ներկայացուցիչ Սեդա Սաֆարյանը հայտնեց, որ իր վստահորդները տարեց մարդիկ են, լավ չեն լսում, իրենց վրա էլ քամի է փչում։

Տուժողի իրավահաջորդ Սարգիս Քլոյանն էլ ասաց, որ ընդամենը երեք հոգի են և տարեց են, վատ են լսում, ուստի՝ ցանկանում են տեղափոխվել։ Արմեն Գևորգյանի պաշտպան Էրիկ Ալեքսանյանն առարկեց՝ նշելով, որ նախ և առաջ կխախտվի սոցիալական հեռավորությունը, բացի այդ՝ տուժողների իրավահաջորդներից մեկը բազմաթիվ անգամներ խախտել է գործի քննության բնականոն ընթացքը և, եթե նա գտնվի իրենց կողքին, ապա հնարավորություն չեն ունենա պատշաճ կերպով աշխատելու։ Պաշտպան Հայկ Ալումյանն էլ արձանագրեց, որ Տիգրան Եգորյանը դեռևս չի ներկայացել դատական նիստին և, եթե նա ներկայանա, արդյո՞ք հնարավոր կլինի ապահովել սոցիալական հեռավորությունը։ Դատարանը որոշեց հարցին անդրադառնալ Տիգրան Եգորյանի՝ նիստին ներկայանալուց հետո։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո