Փաստ ինֆո

Կրեմլում խորապես մտահոգված են Հայաստանի եւ Ադրբեջանի սահմանին տեղի ունեցող փոխհրաձգություններով, կողմերին զսպվածության եւ կրակի դադարեցման կոչ են անում: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը:

«Մենք խորապես մտահոգված ենք հայ-ադրբեջանական սահմանին տեղի ունեցած փոխհրաձգությունների կապակցությամբ։ Մենք կոչ ենք անում երկու կողմերին զսպվածության և հրադադարի ռեժիմի շրջանակներում իրենց պարտավորությունների կատարման հարցում», - ասել Է Պեսկովը՝ պատասխանելով այն հարցին, թե ինչպես են Կրեմլում գնահատում այդ երկրների սահմանին տիրող իրավիճակը։

«Մենք արդեն հայտարարել ենք այն մասին, որ Ռուսաստանը տարբեր մակարդակներով, պատրաստ է իր միջնորդական ջանքերը գործադրել կարգավորման ուղղությամբ՝ լինելով Մինսկի խմբի համանախագահ։ Դուք գիտեք, որ տեղի են ունեցել ԱԳ նախարար Սերգեյ Լավրովի ինտենսիվ հեռախոսային շփումներ Բաքվի և Երևանի իր գործընկերների հետ։ Դրա համար եւս մեկ անգամ մենք զսպվածության կոչ ենք անում երկու կողմերին», - հավելել է նա:

Հուլիսի 12-ին հայ - ադրբեջանական սահմանին սկսված մարտը շարունակվում է երրորդ օրը սահմանակից շրջաններում՝ Թովուզի և Տավուշի շրջաններում, որոնք սահմանակից են նաև Վրաստանին և մի քանի հարյուր կիլոմետր հեռավորության վրա են գտնվում չճանաչված Լեռնային Ղարաբաղից, որտեղ այժմ իրավիճակը հանգիստ է: Գնդակոծության վայրում են Մովսես գյուղի մոտակայքում տեղակայված մարտական հենակետերը: Բաքվի տեղեկատվության համաձայն՝ զոհվել են վեց ադրբեջանցի զինվորականներ, այդ թվում՝ գեներալներ։ Հայկական կողմը հայտարարել է երկու ոստիկանների եւ երեք զինվորականների վիրավորվելու մասին, զոհեր չկան: Ադրբեջանն ու Հայաստանը գնդակոծությունների մեղքը բարդում են միմյանց վրա։ Մի շարք երկրներ և միջազգային կազմակերպություններ մտահոգություն են հայտնել հայ-ադրբեջանական սահմանին տիրող իրավիճակի վերաբերյալ և կողմերին երկխոսության կոչ արել։ ՌԴ ԱԳՆ-ն հայտարարել է, որ պատրաստ է աջակցել Բաքվին և Երևանին իրավիճակի կայունացման համար:

Աղբյուր` Փաստինֆո