Փաստ ինֆո

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, որոշեց հետաձգել վարույթը կասեցնելու և ՍԴ դիմելու մասին միջնորդությունների վերաբերյալ որոշման կայացումը։ Նախագահող դատավոր Աննա Դանիբեկյանն արձանագրեց, որ միջնորդությունների լուծումը հնարավոր չէ տվյալ պահին՝ մինչև միջնորդությունների լուծման համար էական նշանակություն ունեցող հանգամանքների պարզումը։ Մասնավորապես՝ դատարանը նշեց, որ այս պահին Վճռաբեկ դատարանի վարույթում է գտնվում պաշտպանության կողմի վճռաբեկ բողոքը, որով պահանջել են բեկանել՝ ՍԴ դիմելու և գործի վարույթը կասեցնելու մասին առաջին ատյանի դատարանի որոշումը բեկանելու մասին Վերաքննիչ քրեական դատարանի որոշումը և ուժի մեջ թողնել առաջին ատյանի դատարանի որոշումը։ Բացի այդ՝ ՍԴ քննության առարկա է հանդիսանում ՀՀ ՔՕ 300.1-րդ հոդվածի սահմանադրականության հարցը և դատարանը կսպասի նաև այս գործի քննության ավարտին։

Հիշեցնենք, որ պաշտպանական կողմը միջնորդություն են ներկայացրել դատարան՝ գործի վարույթը կասեցնելու և ՍԴ դիմելու մասին։ Պաշտպանական կողմը միացավ միջնորդությանը, տուժող և մեղադրող կողմը առարկեցին։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո