Փաստ ինֆո

«Որպես հայ չեմ կարող գոհունակություն հայտնել ԵԱՀԿ հայտարարության վերաբերյալ, քանի որ անցյալ տարիների ընթացքում էլ այդ կառույցը նախընտրել է իր հայտարարություններում միշտ հավասարության նշան դնել Հայաստանի և Ադրբեջանի գործողությունների միջև, մինչդեռ սահմանային ագրեսիան միշտ իրականացվել է ադրբեջանական կողմի նախաձեռնությամբ։ Հետևաբար, ԵԱՀԿ կոչը պետք է ուղղված լիներ նախ և առաջ ադրբեջանական կողմին, որպեսզի նրանք դադարեցնեն իրենց կողմից սանձազերծված ռազմական ագրեսիան,- «Փաստինֆո»-ի հետ զրույցում ասել է քաղաքագետ Արա Վարդանյանը։

Նա նկատեց, որ 2016 թվականի ապրիլյանի բախումներից հետո մեր դիվանագիտական թիմը կարողացավ շատ մեծ հաջողություն գրանցել՝ Սանկտ Պետերբուրգի և Վիեննայի պայմանավորվածությունների ընթացքում և, եթե այդ պայմանավորվածությունները կյանքի կոչվեին, ապա ամբողջ սահմանների երկայնքով տեղադրվելիք դիտողական սարքերի միջոցով վերահսկում էր իրականացվելու։ Այդ պարագայում, ցանկացած միջադեպից հետո, հաշված օրերի ընթացքում, պարզ կդառնար, թե ով է խախտում հրադադարի ռեժիմը։ «Հիմա, այս նոր իշխանությունն այդ պայմանավորվածությունները վերելակային դիվանագիտության արդյունքում հօդս ցնդեցրեց, ինչի արդյունքում տեսնում ենք, որ վերջին երկու տարվա ընթացքում ԵԱՀԿ Մինսկի խմբի հայտարարություններում նման երևույթներն այլևս որևէ արձագանք չեն գտնում, ինչը շատ վատ է։ Այս ամենը երկու տարվա ապիկար քաղաքականության արդյունք է, այսինքն՝ արտաքին հարաբերություններում, ցավոք սրտի Հայաստանը որևէ էական ձեռքբերումներ չի գրանցել, էլ չխոսենք կորուստների մասին։ Գրեթե բոլոր երկրների հետ մենք վատ հարաբերությունների մեջ ենք, նույնը կատարվում է նաև Արցախի շուրջ բանակցություններում, որտեղ Նիկոլ Փաշինյանի տարբեր տարիներին արած հայտարարությունների պատճառով կարծես լուրջ խնդիրներ է ստեղծել հայկական կողմի համար»,- նշել է նա։

Անդրադառնալով վերջին զարգացումների վերաբերյալ ՀԱՊԿ-ի կողմից արված հայտարարությանը՝ Արա Վարդանյանը նկատեց, որ «ՀԱՊԿ-ը քիչ առաջ տարածած իր հայտարարությամբ դիմել է երկու կողմերին՝ անհապաղ դադարեցնել կրակոցները։ Գիտե՞ք, պարզապես ՀԱՊԿ-ի դեպքում իրավիճակը մի քիչ այլ է, այդ կառույցի աշխատաոճը մի քիչ այլ է, այսինքն՝ ՀԱՊԿ-ին պետք է դիմել։ Ես չեմ տիրապետում տեղեկություններին՝ արդյո՞ք մեր կառավարությունը դիմել է նրանց՝ օգնության համար, թե՞ ոչ։ Ցանկացած դեպքում, պետք է կրկին հիշատակենք մի պարզ, բայց դառը իրականություն, որ նույնիսկ ՀԱՊԿ-ի անդամ երկրների հետ մեզ մոտ վերջին երկու տարիների ընթացքում անհասկանալի հարաբերություններ են ձևավորվել և, դրանով են պայմանավորված այս ողջ իրավիճակի անհասկանալի հանգույցները։ Ստացվում է, որ Հայաստանը չունի ընկեր երկիր, ոչ մի երկիր բացահայտ մեզ չի սատարում՝ նույնիսկ այս իրավիճակում, որում մենք հայտնվել ենք»։

Հեղինակ՝ Նվարդ Մանվելյան

Աղբյուր` Փաստինֆո