Փաստ ինֆո

Առավել քան հիմնավոր է ՀՀ ՔՕ 300-րդ հոդվածի սահմանադրականության հարցի պարզումը։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց Ռոբերտ Քոչարյանի պաշտպան Արամ Վարդևանյանը՝ ներկայացնելով գործի վարույթը կասեցնելու և ՍԴ դիմելու մասին միջնորդությունը։

Նշենք, որ նման միջնորդությամբ հանդես են եկել Սեյրան Օհանյանի և Ռոբերտ Քոչարյանի պաշտպանները։

Վարդևանյանը հիշեցրեց նաև դատախազների այն պնդումը, թե իրենց համար հասկանալի չէր «Յոթի» գործով դատախազների կողմից մեղադրանքից հրաժարվելու մասին միջնորդությունը և գնահատականը, որ 300.1-րդ հոդվածը նոր հանցակազմ է՝ ընդգծելով, որ հենց դրա վերաբերյալ գնահատականը ևս պետք է տրվի սահմանադրական արդարադատության ընթացքում։

«Այն, որ նշված հարցի վերաբերյալ փաստացի երկու կողմերն ունեն որոշակի մեկնաբանության տարբերություն, չնայած կարծում եմ, որ, եթե այլ դատախազներ նստած լինեին, որոնք նստած էին դատարանում 2009թ-ին, չէինք ունենա որևէ անհամաձայնություն, բայց ունենք այն, ինչ ունենք։ Այս հարցի վերաբերյալ շատ հստակ պարզաբանումը կտրվի սահմանադրական արդարադատության ընթացքում, հիմա գուցե իսկապես պարզվի, որ «Յոթի» գործով լրջագույն խնդիրներ կան, գուցե նոր ի հայտ եկած հանգամանքներ լինեն»,- ասաց Վարդևանյանը։

Նա ընդգծեց, որ ՍԴ-ն ոչ մեկ անգամ է արձանագրել, որ որոշակիության հետ կապված հարցերի լուծումը բացառապես վերապահված է ՍԴ-ին։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո