Փաստ ինֆո

Դատարանը պետք է կասեցնի ՀՀ երկրորդ նախագահ Ռոբերտ Քոչարյանի և մյուսների վերաբերյալ գործի վարույթը և դիմի ՍԴ՝ նոր օրենքի և հին օրենքի սահմանադրականության հարցով։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասել է Սեյրան Օհանյանի պաշտպան Կարեն Մեժլումյանը՝ ներկայացնելով գործի վարույթը կասեցնելու և ՍԴ դիմելու մասին միջնորդությունը։

Միջնորդության հիմքերին անդրադառնալիս պաշտպան Մեժլումյանը նշեց, որ 2008թ մարտի 1-2 դեպքերից հետո ընդդիմության բազմաթիվ առաջնորդներ կալանավորվել են և նրանց մեղադրանք է առաջադրվել այդ պահին գործող քրեական օրենսգրքի համապատասխան հոդվածով՝ պետական իշխանությունը յուրացնելու և սահմանադրական կարգը բռնությամբ տապալելուն ուղղված գործողությունների հատկանիշներով։ Նա հիշեցրեց, որ ընդդիմության նկատմամբ քրեական և այլ հետապնդումների վերաբերյալ ԵԽ-ն մի քանի բանաձևեր ընդունեց Հայաստանի վերաբերյալ և որոշակի պահանջներ ներկայացրեց, որոնցից առաջինը ԵԽԽՎ բանաձևն էր, որից հետո՝ 2008թ հոկտեմբերին ընդունվեց մեկ այլ բանաձև,որով իշխանություններից պահանջել են հրաժարվել ՀՀ ՔՕ 300-րդ հոդվածով առաջադրված մեղադրանքներից և կալանավորված մարդկանց ազատ արձակել, կարճել գործի վարույթը։ Բացի այդ՝ ԵԽԽՎ մարդու իրավունքների հանձնակատարն իր զեկույցում անդրադարձել էր ՀՀ ՔՕ 300-րդ հոդվածին և նշել, որ այն որոշակի և հստակ չէ։ Ինչ վերաբերում է ՀՀ քրեական օրենսգրքում փոփոխություններից հետո 300.1-րդ հոդվածին, ապա պաշտպանը նշեց, որ քննչական խմբի ղեկավար Վահագն Հարությունյանը որոշում է կայացրել Նիկոլ Փաշինյանին առաջադրված մեղադրանքը փոփոխելու և նոր մեղադրանք առաջադրելու մասին՝ նկատի ունենալով, որ փոփոխություններ են կատարվել ՀՀ ՔՕ-ում, իսկ Նիկոլ Փաշինյանի նկատմամբ ՀՀ ՔՕ 300-րդ հոդվածի 1-ին մասով քրեական հետապնդումը ենթակա է դադարեցման, հետևյալ պատճառաբանությամբ՝ Նիկոլ Փաշինյանին ՀՀ ՔՕ 300-րդ հոդվածի 1-ին մասով մեղադրանք է առաջադրվել այն բանի համար, որ նա մի խումբ անձանց հետ նախնական համաձայնությամբ իրականացրել է սահմանադրական կարգի բռնությամբ տապալելուն և պետական իշխանությունը բռնությամբ զավթելուն ուղղված դիտավորյալ գործողություններ, մինչդեռ՝ ԱԺ կողմից 2009թ ընդունված «ՀՀ Քրեական օրենսգրքում փոփոխություններ և լրազումներ կատարելու մասին օրենքով» սահմանվել է արարքի նոր հանցակազմ և նկատի ունենալով, որ անձի վիճակը վատթարացող օրենքը հետադարձ ուժ չունի, ուստի՝ Նիկոլ Փաշինյանի նկատմամբ քրեական հետապնդումը ենթակա է դադարեցման։ Պաշտպան Մեժլումյանը նշեց, որ նոր օրենքն ընդունելուց մեկ շաբաթ անց, դատախազությունը որոշում է կայացրել նաեւ «Յոթ»-ի գործով ամբաստանյալներ՝ Սասուն Միքայելյանի, Շանթ Հարությունյանի, Ալեքսանդր Արզումանյանի, Հակոբ Հակոբյանի, Մյասնիկ Մալխասյանի, Գրիգոր Ոսկերչյանի, Սուրեն Սիրունյանի նկատմամբ քրեական հետապնդումն իրականացնելուց հրաժարվելու մասին՝ հանցակազմի բացակայության հիմքով և դատարանը որոշում է կայացնում քրեական հետապնդումը դադարեցնելու և գործի վարույթը կարճելու մասին։

Կարեն Մեժլումյանը գտնում է, որ, եթե դատարանը որոշել է այս փուլում դեռևս չկարճել գործի վարույթը ՀՀ ՔՕ 300.1-րդ հոդվածի մասով, ուստի՝ պետք է կասեցնել գործի վարույթը և դիմել ՍԴ՝ հին և նոր օրենքների սահմանադրականության հարցով։
Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո