Փաստ ինֆո

Ռոբերտ Քոչարյանի եւ մյուսների գործով ՀՀ քրեական օրենսգրքի նախկին 300-րդ հոդվածի սահմանադրականության հարցով ՍԴ դիմելու միջնորդության քննարկումը հետաձգելով դատարանը խախտում է պաշտպանական իրավունքը։ Նման հայտարարությամբ այսօր հանդես է եկել ՀՀ պաշտպանության նախկին նախարար Սեյրան Օհանյանի փաստաբան Կարեն Մեժլումյանը։

Հիշեցնենք, որ Կ.Մեժլումյանը եւ երկրորդ նախագահի փաստաբաններն այսօր միջնորդություն էին ներկայացրել՝ դատարանում գործի քննությունը կասեցնելու եւ 300-րդ հոդվածի սահմանադրականությունը պարզելու համար ՍԴ դիմելու մասին, որն, ըստ էության քննարկվեց, սակայն դատարանը չհեռացավ խորհրդակցական սենյակ՝ որոշում կայացնելու, այլ հայտարարեց, որ հետաձգում է քննարկումը՝ մինչեւ Վճռաբեկ դատարանում եւ Սահմանադրական դատարանում առկա դիմումների գործով որոշման կայացումը։

Կ.Մեժլումյանի դիտարկմամբ՝ և՛ ՍԴ վարույթում գտնվող դիմումը, և Վճռաբեկ դատարան ներկայացված բողոքը վերաբերում են ՀՀ ՔՕ 300.1-րդ հոդվածին, իսկ 300-րդ հոդվածի առումով դա բաց է, մինչդեռ էականը հենց ՀՀ ՔՕ 300-րդ հոդվածն է, շեշտը դրա վրա է դրված։
Մեժլումյանն ընդգծեց, որ այդ հոդվածի սահմանադրականության հարցի լուծման դեպքում, օրինակ՝ հակասահմանադրական ճանաչվելու դեպքում, գործն իր տրամաբանական լուծումը կստանա։

«Գտնում եմ, որ դատարանի նման ձևով որոշման հետաձգումը մեր պաշտպանական իրավունքի խախտում է, որովհետև մենք պետք է գործը քննենք, այդ 300-րդ հոդվածն օդում կախված է կամ մի քանի տարի հետո նորից դիմելու ակնկալիքով»,- ասաց Մեժլումյանը։
Ռոբերտ Քոչարյանի պաշտպանական խմբի անդամ Հովհաննես Խուդոյանը ևս առարկեց՝ նշելով, որ դատավարության ցանկացած մասնակցի անքննելի իրավունքն է ունենալ պատճառաբանված ակտեր, իսկ դատարանը կայացրեց որոշում՝ միջնորդության վերաբերյալ որոշում կայացնելը հետաձգելու մասին, սակայն ինքը դատարանի կողմից պատճառաբանություն չի լսել և խնդրեց դատարանին պատճառաբանել դատական ակտը, որովհետև այդկերպ ինքը կիրացնի իր վստահորդի իրավունքները՝ հետագա բողոքարկումների և դատարանի գործողություններին գնահատական տալու հարցում։

Փաստաբանը հայտարարեց, որ դատարանից ակնկալում են ստանալ պատճառաբանված որոշում՝ միջնորդության քննության հետաձգման մասին՝ նկատի ունենալով, որ իրենց կողմից բարձրացված հարցերի, այն է` ՀՀ քրեական օրենսգրքի 300-րդ հոդվածի սահմանադրականության վերաբերյալ, որեւէ դիմում կամ բողոք չկա ոչ ՍԴ-ի եւ ոչ էլ ՎԴ-ի վարույթում։
Նախագահող դատավոր Աննա Դանիբեկյանն էլ արձագանքեց՝ նշելով, որ պատճառաբանել է իր որոշումն այնպես, ինչպես հարկ է համարել և պարտավոր չէ պարզաբանել իր որոշումները, բացի այդ՝ շեշտեց, որ դատարանի կողմից կայացված որոշումները չեն քննարկվում։
Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո