Փաստ ինֆո

Հակառակորդի սադրիչ գործողություններին տրվել է թիրախային պատասխան՝ պատճառելով զգալի կորուստներ։ Այս մաիսն կառավարության նիստում հայտարարել է ՀՀ պաշտպանության նախարար Դավիթ Տոնոյանը։

Նախարարը ներկայացրել է, թե ինչպես են իրադարձությունները զարգացել հուլիսի 12-ին ու լույս 13-ի գիշերը։ «Երեկ 12.30 մեր դիրքերից մեկին մոտենում է ՈՒԱԶ ավտոմեքենա, անհասկանալի պատճառներով զինծառայողները դուրս են գալիս մեքենայից և շարժվում դեպի մեր դիրքը։ Հիշեցնեմ, որ դիրքը գտնվում է ՀՀ տարածքում՝ անմիջապես ՀՀ սահմանի վրա»,- ասել է Դ.Տոնոյանը։

Նրա փոխանցմամբ՝ շարժումն անսպաելի է եղել մեր զինծառայողների համար, նրանք վերադասին զեկուցելիս ստացել են հրահանգ՝ հաշվի առնելով հնարավոր ադրբեջանական զինծառայողների մոլորվածությունը՝ աշխարհագրության, կամ օպերատիվ իրավիճակին չտիրապետելու պատճառով, կոչ անել լքել տարածքը, որը և իրականացվել է։ «Թողնելով ավտոմեքենան նրանք վերադառնում են իրենց դիրքերը , որից հետո սկսվում է հրետակոծություն դեպի նույն դիրքը, ինչպես նաև մարտական խմբերի շարժ դեպի այդ դիրքը, որը կասեցվել է հրետակոծությամբ և համապատաասխան գործողություններով։ Հակառակորդը կրելով կորուստներ նահանջել է»,-տեղեկացրեց Դավիթ Տոնոյանը։

ՀՀ ՊՆ Դավիթ Տոնոյանը հայտնել է, որ մինչ այժմ նույն սցենարով տարբեր տրամաչափի հրետանու օգտագործմամբ՝ պարբերաբար 15-20 րոպեն մեկ հրետակոծությունը վերսկսվում է։

«Դադարը եղել է գիշերը 3․30-ից մինչև 5։30։ Բոլոր հրետակոծությունները թիրախավորվում են, դիպուկահար կրակով լռեցվում են, որի արդյունքում հակառակորդը ունի զգալի կորուստներ։ Մեր զինված ուժերը և համապատասխան կորպուսը շարունակում է սահմանի պահպանությունը, օպերատիվ իրավիճակը վերահսկվում է և կառավարելի է»։

Վարչապետի հարցին ի պատասխան, թե գուցե ադրբեջանցի զինծառայողները ցանկանում էին վերադարձնել մեքենան, Տոնոյանը պատասխանեց.

«Եթե ցանկություն ունենային վերադառնալ մեքենայի համար, ինչ որ ձև կապի դուրս կգային և չկրակելու պայմանավորվածություն ձեռք բերվեր, որպեսզի ավտոմեքենան վերադարձվի։ Անմիջապես սկսվել է հրետակոծություն»։

Աղբյուր` Փաստինֆո