Փաստ ինֆո

Ոստիկանությունը տարածել էր տեղեկություն իբրև թե Արամ Վարդանյանին հայտնաբերել են Արցախի փողոցի ինչ-որ տներից մեկում, և նրանք չէին ասել այն մասին, որ նա գտնվել է իր սեփական տանը։ Այս մասին այսօր լրագրողների հետ զրույցում ասաց քրեական հեղինակություն Արամ Վարդանյանի փաստաբան Լուսինե Սահակյանը։

«Երբ նրանք եկել են, ինքն էլ ասել է՝ եկել եք, լավ եք արել, հիմա ասեք՝ ինչ եք ուզում ինձանից։ Այսինքն սա այնքան բացառիկ իրավիճակ է, երբ բազմիցս ասում ես, որ ասեք ուր գանք, մենք գանք, եթե քննչական գործողություն կատարելու անհրաժեշտություն կա, իրենք անընդհատ հայտարարում են, որ անձը գտնվում է հետախուզման մեջ։ Հիմա էլ իբրև թե հետախուզվող անձի են հայտնաբերել և ըստ այդմ միջնորդություն է ներկայացվել, որպեսզի վերահաստատվի այն որոշումը, որը կա։ Այսօր դատարանը հնարավորություն ունի՝ ստուգելու այդ փաստերը և տեսնելու՝ արդյոք նրա նկատմամբ կալանքը պետք է ընտրվի որպես խափանման միջոց և արդյոք կա հիմնավոր կասկած։ Ոստիկանությունը հաղորդագրությունները տարածելիս ասում է՝ սպանության փորձ, առևանգում, կողոպուտ և այլն, բոլոր մեղադրանքներով դատարանը համարել է, որ հիմնավոր կասկածն առկա չէ։ Գեթ մեկ ապացույց չկա, որ նա այդ մեղադրանքների հետ առնչություն ունի»,-ասաց Լուսինե Սահակյանը։

Վերջինս նշեց, որ ոստիկանությունն այս ամեն ինչն իր շոուի շրջանակներում է կազմակերպում։ Լուսինե Սահակյանի խոսքով միայն այն, որ իրենք նման կերպ են անձին բերման ենթարկում և առավել ևս տեսանկարահանում ու տարածում են, դա արդեն իսկ իրավունքի կոպիտ խախտում է.

«Իրենք իրենց վախն են ցույց տալիս բոլորից։ Միայն այն, որ այդքան անձ նրան բերման են ենթարկում, ինչ դիմադրություն պետք է ցույց տա, առավել ևս, որ դիմադրության անհրաժեշտություն էլ չկա։ Մենք նշել ենք, որ նա կարող է ներկայան՝ ուր ասեն, բայց բնականաբար պետք չի եղել, որ ներկայանա, որովհետև բազմաթիվ ապացույցներով հիմնավորվում է, թե ինչպիսի ակնհայտ շինծու մեղադրանքներ են առաջադրված։ Մենք ունենք բազմաթիվ ապացույցներ, որոնք հիմնավորում են դա։ Կգա ժամանակը և կիմանաք, թե ինչու են նման մեղադրանքներ առաջադրվում և ովքեր են այն կազմակերպիչները, որոնք այս մեղադրանքների հետևում են կանգնած»,-հավելեց Լուսինե Սահակյանը։

Աղբյուր` Փաստինֆո