Փաստ ինֆո

Արդեն 4-րդ անգամ արտակարգ դրության երկարացումը բոլորիս համար պետք է ավելի մեծ զգոնության և լրջության ազդակ լինի։ ԱԺ հատուկ նիստի ժամանակ ասաց ՀՀ փոխվարչապետ, Պարետ Տիգրան Ավինյանը։

«Երկրում արտակարգ դրության հիմք հանդիսացող ռիսկերը չեզոքացված չեն։ Ներկա դրությամբ համավարակի հետ կապված իրավիճակը մնում է մտահոգիչ, սակայն նաև կառավարելի՝ առողջապահական սպասարկման տեսանկյունից։ Միաժամանակ առանց արտակարգ դրության իրավական ռեժիմի հնարավոր չի լինի սահմանել և վերահսկել գործող սանիտարահամաճարակային և այլ կանոնների պահպանումը։ Հույս ունենք արտակարգ դրությունը հետագայում երկարացնելու կարիք չի լինի»։

Տիգրան Ավինյանը տեղեկացրեց, որ ներկայումս դիտարկում են արտակարգ իրավիճակում բնակչության պաշտպանության, և սանիտարահամաճարակային անվտանգության հետ կապված օրենսդրական փոփոխությունների հնարավորությունը՝ ներդնելով այնպիսի կառուցակարգեր, որոնք հնարավորություն կտան կարանտինային միջոցառումների նպատակով կիրառել որոշ սահմանափակումներ և կանոններ, որոնք բավարար կլինեն վարակի տարածումը կանխարգելելու համար։

«Նույնիսկ այդ պարագայում հնարավոր չի լինի արտակարգ դրության ժամանակ կիրառվող բոլոր գործիքների կիրառումը՝ ներկայիս ծավալով։ Հետևապես հետագա կարգավորումների մասով ընտրությունը կախված է լինելու համավարակի զարգացման դինամիկայից»։

Տիգրան Ավինյանը ներկայացրեց նաև վիճակագրություն. մինչ օրս հաստատված վարակակիրների թիվը 32.151 է, որից փաստացի բուժում է ստանում 11.530 պացիենտ, ունենք մոտ 20.000 առողջացածներ և ցավոք մահվան 573 դեպք։ Տնային հսկողության տակ գտնվող քաղաքացիների թիվը մոտ 10.000 է։ Շուրջ 8.000 ՀՀ քաղաքացիներ տեղափոխվել են Հայաստան, որից 2200-ի տեղափոխումը տարբեր բարերարների աջակցությամբ է տեղի ունեցել։

Մարտ ամսից ի վեր վարակակիրների ստացիոնար սպասարկման համար ծավալվել է ավելի քան 2500 մահճակալ, որից ավելի քան 300-ը ռեանիմացիոն։ Պացիենտների հիվանդանոցային բժշկական օգնությունն իրականացվում է 19 բժշկական կազմակերպությունում ՝ 7-ը մարզերում, 12-ը երևանում։

5.680 բուժաշխատող մասնակցել է նոր կորոնավիրուսային վարակի, կանխարգելման և հսկողության նմուշառման տեխնիկայի վերաբերյալ դասընթացի։

Հայաստանի գործընկերներին օգնելու նպատակող բարեկամ երկրներից ժամանել են բազմաթիվ բուժաշխատողներ։ Հուլիսի 6 ի դրությամբ Հայաստան է ժամանել 46 մասնագետ Գերմանիայից, Ֆրանսիայից, Ռուսաստանից, Լիտվայից և Իտալիայից։ Նրանք վարակաբաններ են, բուժքույրեր, համաճարակաբաններ։

Աղբյուր` Փաստինֆո