Փաստ ինֆո

Փաշինյանը չի՞ պատկերացնում, թե ինչ է տեղի ունենում հայ-ադրբեջանական սահմանին, թե՞ հերթական անգամ ընտանյոք փորձ են անում հաճոյանալ իրենց կիրթ և ինտելոկտուալ գործընկերոջն ու թուրքադրբեջանասեր կառույցներին:

Այսպիսի տպավորություն ես ստանում, երբ լսում ես կառավարության նիստի ընթացքում Փաշինյան- Տոնոյան երկխոսությունը, որի ընթացքում Փաշինյանը փորձ է անում կենցաղային մակարդակի արդարացումներ գտնել ադրբեջանցիների համար, թե ՝ պարոն Տոնոյան, իսկ հնարավո՞ր է «ՈՒԱԶ» մեքենայի հետ է կապված, ադրբեջանցիներն ուզեցել են վերցնել մեքենան և դրա համար է սկսվել գործողությունները: Պատկերացնու՞մ եք, երկրի ղեկավարի հարցը, որով նա իր երևակայության շրջանակում փորձում է Ֆրանց Ֆերդինանդի սպանություն մոտիվներով մի առիթ գտնել ու բարձրաձայնել այն ի պաշտպանություն ադրբեջանցիների և Ալիևի:

Սակայն, պաշտպանության նախարարի պատասխանը՝ «եթե այդպես լինել, չկրակելու պայմանավորվածության մասին կհայտնեին, մինչդեռ անմիջապես սկսվել է մեր դիրքերին ուղղված հրետակոծությունը, կիրթ-ինտելեկտուալին պաշտպանելու տեղ չի թողնում:

Իրականում, ադրբեջանցիները հերթական անգամ փորձել են մոտենալ մեր դիրքերին և ստուգել հայերի ռեակցիան, մարտունակությունը՝ կողմնորոշվելու համար իրենց հետագա գործողություններում: Բայց մեր զինվորների և հրամանատարների համագործակցված աշխատանքի արդյունքում նրանք իրենց «ՈՒԱԶ»-ը թողել հեռացել են: Եվ հեռանալով սկսել են հրետակոծել մեր դիրքերը: Պատասխանը, բնականաբար, չի ուշացել՝ լուրջ զոհեր պատճառելով ադրբեջանցիներին:

Հիմա, ուշագրավ է, որ տեղի ունեցածին Փաշինյանի՝ յուրատեսակ արդարացումներ որոնողի մեկնությանն իր կամուֆլյաժազգեստ-խաղաղասիրական մեկնությունն է խառնում նրա կինը՝ օդի մեջ ռազմական գործողությունները դադարեցնելու եւ դեպի խաղաղություն շարժվելու կոչ տարածելով: ՈՒ՞մ է ուղղված նրա կոչը՝ այդպես էլ հստակ չի դառնում: Իսկ միգուցե այս կոչն էլ հերթական մեսի՞ջն է առ եվրոկառույցներ, թե՝ տեսեք-տեսեք ես խաղաղասիրական կոչերս նույն տոնով շարունակում եմ…

Իրականում, նա խուսափում է իրական հասցեատիրոջն՝ Ադրբեջանին ուղղել իր կոչը, քանի որ հայկական կողմը ոչ մի գործողություն ո՛չ սկսել է, ո՛չ էլ՝ նախաձեռնել: Մեր հայրենիքի սահմանի վրա թշնամին սադրիչ գործողություններ է սկսել, մեր բանակն էլ, արագ կանխել է այն՝ պատճառելով թշնամուն կորուստներ:

Այս՝ ադրբեջանական սադրանքի, ապա նաև՝ հրետակոծության ու հայկական կողմի ադեկվատ պատասխանի միջև հավասարության նշան դնողը ՀՀ վարչապետի տիկինն է, որը երեք լեզուներով հայտարարություն է տարածել, թե՝ «երեկվանից լարվել է իրավիճակը հայ-ադրբեջանական սահմանին, հայկական եւ ադրբեջանական զինված ուժերի միջեւ սկսվել են մարտեր»:

Հարց է առաջանում ինչու՞ նա չի ասում, որ ադրբեջանցիք են սկսել,նրանք նախ՝ սադրել են, ապա՝ կրակ բացել, իսկ հայրենիքի սահմանը պաշտպանող հայկական կողմը միանգամից հետ է մղել թշնամուն:

Ի դեպ, պաշտպանության նախարարն արդեն իսկ հավաստիացրել է, որ «ՀՀ սահմանների ուղղությամբ հակառակորդի սադրանքների պարագայում` արձագանքը կլինի ըստ անհրաժեշտության` ընդհուպ մինչև նոր բարենպաստ դիրքերի զբաղեցում»:
Իսկ մինչ այդ, փաստենք, որ ադրբեջանական կողմն, ըստ պաշտոնական տեղեկատվության, մի քանի ժամվա ընթացքում տվել է 4 զոհ:

Հեղինակ՝ Մարինե Մինասյան

Աղբյուր` Փաստինֆո