Փաստ ինֆո

Ադրբեջանական զինուժի սադրիչ գործողությունները խստագույնս դատապարտելի են։ Այս մասին այսօր կառավարության արտահերթ նիստի ժամանակ ասաց ՀՀ վարչապետ Նիկոլ Փաշինյանը՝ տեղեկացնելով, որ հակառակորդը գրոհել է Մովսես գյուղի դիրքերը։

Վարչապետը նշեց, որ այսօր առավոտյան դրանք վերսկսվել են և դրանց վերսկսմամբ Ադրբեջանի ռազմաքաղաքական ղեակավորությունը կրելու է տարածաշրջանի ապակայունացման անկանխատեսելի հետևանքների ողջ պատասխանատվությունը. «Խիստ մտահոգիչ է տարածաշրջանային անկայունություն հրահրելու Թուրքիայի գործելակերպը, որը լավագույնս արտացոլված է այդ երկրի արտաքին գործերի նախարարության պաշտոնական հայտարարությամբ, որտեղ վերջինս անվերապահ աջակցություն է հայտնում Ադրբեջանի գործողություններին։ Այս ռազմական միջադեպը չի առաջացել վակումում։ Արդեն տևական ժամանակ է Ադրբեջանի ղեկավարությունը փորձում է խաղարկել հակահայկական քարտն՝ իրենց հայտնի դրդապատճառներից ելնելով։ Հնարավոր է՝ գործ ունենք ներքին խնդիրները սահմանային իրավիճակի սրմամբ երկրորդ պլան մղելու Ադրբեջանի ռազմաքաղաքական ղեկավարության գործելաոճի հետ, որի համատեքստում աչքի է զարնում ակնհայտ քամահրական վերաբերմունքը մարդկային կյանքերի, այդ թվում ադրբեջանցի զինվորների կյանքերի նկատմամբ, որն արտահայտվում է նրաց ուղարկելով անհեռանկար գործողությունների»,-ասաց վարչապետը՝ ընդգծելով, որ սրա մասին է վկայում նաև այն, որ Ադրբեջանն այդպես էլ չմիացավ համավարակի ժամանակ գլոբալ հրադադար հայտարարելու ՄԱԿ-ի գլխավոր քարտուղարի կոչին։

Նիկոլ Փաշինյանը նկատեց՝ ստացվում է որքան համավարակը տարածվում է Ադրբեջանում, որքան սրվում է սոցիալ-տնտեսական վիճակը, այնքան սրվում է Ադրբեջանի ռազմաքաղաքական ղեկավարության հակահայկական և ռազմատենչ հռետորաբանությունը։

Մանրամասները՝ տեսանյութում։

Աղբյուր` Փաստինֆո