Փաստ ինֆո

«Դեռևս ապրիլյան պատերազմի օրերից մենք հասկացել ենք, որ սահմանային լարված իրավիճակներում ադրբեջանական հաքերային հարձակումների զոհ է դառնում հիմնականում լրատվական դաշտը, այսինքն, այսպիսի իրավիճակում ամենախոցելի կարգավիճակում են հայտնվում հենց լրատվական կայքերը։ Սա արվում է հստակ այն նպատակով, որպեսզի տեղական լրատվական հոսքը լռեցվի, որի արդյունքը լինում է այն, որ ողջ դաշտը ողողվում է ադրբեջանական կողմից, որպես կանոն կեղծ ու սադրիչ տեղեկատվությամբ ,- «Փաստինֆո»-ի հետ զրույցում ասել է տեղեկատվական անվտանգության մասնագետ Սամվել Մարտիրոսյանը։

Ըստ նրա՝ 2016 թվականի ապրիլյան ռազմական գործողություններից հետո լրատվական լուրջ կայքերն անցան լրացուցիչ պաշտպանական ծրագրեր կիրառելու օրինակին, ինչի արդյունքում այս օրերին լրատվական կայքերը մեծ խնդիրներ չեն ունեցել։ «Միայն Հետքն է տուժել, մի քանի ժամով կայքի աշխատանքն արգելափակվել է, իրենցից տեղեկացա, որ ադրբեջանական հակերային հարձակման արդյունքում»,- ասաց Ս.Մարտիրոսյանը։

Անդրադառնալով սահմանային լարված իրավիճակներում պետական նշանակության պաշտոնական կայքերի տեղեկատվական անվտանգության, տեղեկատվական հոսքերի անվտանգությանը՝ Սամվել Մարիտիրոսյանն ընդգծում է՝ պետական նշանակության պաշտոնական կայքերն, այնպիսին, ինչպիսին են օրինակ Կառավարության կայքը, հսկվում են Ազգային Անվտանգության Ծառայության կողմից։

Խոսելով այն մասին, թե ինչ վարքագիծ պետք է որդեգրեն սոցիալական ցանցերի պարզ սպառողները՝ հակերային հարձակման զոհ չդառնալու համար, պարոն Մարտիրոսյանը նշում է՝ նախ և առաջ պետք չէ պատասխանել կասկածելի թվացող կան անծանոթ օգտատերերի կողմից ուղարկված հաղորդագրություններին։ Այստեղ տեղեկատվական անվտանգության մասնագետը հիշեցնում է. «Նույնիսկ եթե անծանոթ աղբյուրներից ստացված կասկածելի նամակները հայերեն լեզվով են, սա լավ մտածված ծուղակ է ադրբեջանական հակերների կողմից, որովհետև գաղտնիք չէ, որ ադրբեջանական հակերային խմբերից շատերը բավարար չափով տիրապետում են հայերեն լեզվին։

Այնպես որ, ամենաէական խորհուրդը, որ հիմա պետք է իմանան սոցցանցերի պարզ սպառողներն, այն է, որ երկխոսությոնների մեջ չմտնեն կասկածելի օգտատերերի հետ»։

Հեղինակ՝ Նվարդ Մանվելյան

Աղբյուր` Փաստինֆո