Փաստ ինֆո

ԱԺ ԲՀԿ խմբակցության պատգամավոր Միքայել Մելքումյանն այսօր ԱԺ հատուկ նիստում հայտարարեց, որ կորոնավիրուսի դեմ պայքարում կառավարության ձեռնարկած քայլերի գնահատականը գրանցված համաշխարհային մակարդակի հակառեկորդներն են։

«Էլ քանի անգամ է բերվելու արտակարգ դրության երկարացման թեզը, կարո՞ղ է 14-րդ անգամ էլ բերվի՞։ Կարող է ասեք՝ ինչքան պետք է լինի՝ էդքան էլ բերվելու է։ Պետք է հասկանանք ինչի համար ենք երկարաձգում, հասկանանք ի՞նչ կատարվեց։ Դրա համար ես բաժանեցի 4 ամիսները 3 մասի՝ մարտի 1-ից մարտի 16-ը, ի՞նչ էր կատարվում, ո՞վ պետք է տեղեկատվությունը սեղանին դներ, եթե դրվել է և որոշումը չի ընդունվել, և շարունակվել է քարոզարշավը, սա մի բան է, եթե չի դրվել՝ շատ ավելի վատ։ Փոխվարչապետը և պարետն ասում են, որ հայեցակարգային հարց ունեինք։ Ավելի վատ՝ այսինքն` այդ փուլում պետությունը չի իմացել ի՞նչ անի, ո՞նց մենք գնահատենք։

Գնահատականը հետևյալն է՝ մահեր, թեստավորման ծավալ, վարակակիրներ և այլն։ Հիմա ո՞նց գնահատենք, եթե մենք համաշխարհային հակառեկորդներ ենք սահմանում, գտնվում ենք 9-րդ տեղում և բացասական առումով մեզնից առաջ են մի շարք փոքր պետություններ»,- հայտարարեց Մելքումյանը։

Նա կոչ արեց բացել հայեցակարգային խնդիրները։ Հիշեցրեց, որ վարչապետը ուղիղ եթերում ասել էր, որ «կառավարման և կազմակերպչական սխալներ ենք թույլ տվել»։ Ինքը, սակայն, կարծում է, որ կազմակերպչական առումով հայեցակարգային սխալներ չեն լինում։

«Մենք զգուշացրել էինք, որ օգոստոս-սեպտեմբեր ամիսներին վիճակը լրջանալու է, մենք կորցնում ենք աշխատատեղեր։ Ճիշտ է՝ մայիսին բացեցինք ձեռնարկություններ, կազմակերպություններ, բայց դրանց մեծ մասը շահութաբեր չեն աշխատում։ Վնասով աշխատել՝ նշանակում է աշխատատեղեր փակվել։ Դա նշանակում է սպառողական մակարդակը իջնելու է , քիչ սպառել նշանակում է սոցիալական անվտանգության և հարկային մուտքերի խնդիր։ Մեր հանրապետությունը կարիք ունի մեծածավալ փոխառու միջոցների ներգրավվման, առանց որի չենք կարողանալու կազմակերպել մեր տնտեսությունը»,- ընդգծեց Մելքումյանը

Նա հավելեց, որ կարծում է՝ հնարավորություն կա վիճակը շտկելու։

«Որոշումները կայացնում եք՝ վիճակը վատանում է, ասեք վիճակը կառավարելի է ՝ հասկանանք։ Սիրելի ժողովուրդ, մենք կարծում ենք, որ կա հնարավորություն՝ վիճակը շտկելու։ Բայց երբ որ լուծումները հապաղում և չեն գտնվում, երբ համարվում է, որ ամենագետներ կան, որոնք ինքնուրույն են որոշումները կայացնում, դա լավ չի։ Հասնելու է նաև հավաքական պատասխանատվության պահը։ Ուղղակի հետաքրքրում է քանի անգամ պետք է գանք երկարացնենք արտակարգ դրությունը։ Ամեն անգամ ի՞նչ ենք ասելու։ Հանգիստ նստեք տեղներդ սովը կսկսվի թե չէ, դուք եք պատասխանելու, ով անում է ռեպլիկը, հանգիստ նստեք տեղներդ»։

Մանրամասները՝ տեսանյութում։

Աղբյուր` Փաստինֆո