Փաստ ինֆո

«ԱՄՆ Պետդեպը պատրաստվում է ՀՀ Կառավարություն գործուղել ԱՄՆ քաղաքացիություն ունեցող հատուկ խորհրդականի, ով կաջակցի ՀՀ կառավարությանը կոռուպցիայի դեմ պայքարում։ Ի՞նչ է սա, եթե ոչ այլ պետության ուղղակիորեն միջամտություն ինքնիշխան պետության գործերին, - այս մասին հայտնում է հասարակական գործիչ Գևորգ Գևորգյանը ֆեյբուքյան գրառման մեջ և հավելում, - սա իր մեջ բազմաթիվ ռիսկեր պարունակող և արտաքին ազդեցությունների համար կանաչ լույս վառող գործարք է, որի պատասխանատուն իշխանությունն է»։ 

«Փաստինֆո»-ի հետ զրույցում Գևորգ Գևորգյանը մանրամասնեց, որ «Այս տեղեկությունը տարածել է ռուսաստանյան մամուլը և, երբ նայում եք քաղաքական վարման կարգին, թե ի՞նչ զարգացումներ են տեղի ունենում տարածաշրջանում, քիչ թե շատ սկսվում է հաստատվել այս իրողությունը։ Եթե Պետդեպից Հայաստան է գործուղվում ԱՄՆ քաղաքացի, ով, իբր պետք է պայքարի կոռուպցիայի դեմ և, փաստորեն, անարգելք մուտք ունենա մեր կառավարման և անվտանգության համակարգ, ապա սա ազգային անվտանգության տեսանկյունից, անթույլատրելի քայլ է։ Այլ կերպ ասած, սա դատաիրավական համակարգի և պետական ապարատի գործունեության մեջ այլ պետության շահի իրացման պրոցես է, որը կարող է շատ արագ փոխել նաև մեր աշխարհաքաղաքական ուղղությունը՝ ոչ ի նպաստ Հայաստանի Հանրապետության և Հայ Ազգի։ Այս քայլերը ուղղակիորեն հակասում են մեր պետության շահերին և պետք է արժանանան հակազդեցության»։

Խոսելով այն մասին՝ ինչպե՞ս այս քայլը կանդրադառնա հայ – ռուսական հարաբերությունների վրա և արդյո՞ք ծանր հարված չի լինի բարեկամական հարաբերությանը, բանախոսը նկատում է.« Եթե հայ ռուսական հարաբերություններում դաշնակից – գործընկեր բալանսը ճիշտ պահպանվի, այլ ոլորտների հետ համագործակցությունը ճիշտ ուղով ընթանա, ապա մենք կարող ենք հույս ունենալ լավ հարաբերությունների։ Հակառակ պարագայում, սա ռուսական կողմի համար կարող է արտաքին քաղաքական վեկտորի տեսանկյունից անհանգստացնող ազդակի դեր խաղալ»։

Արդյո՞ք լարված սահմանային վիճակի, երկրում տիրող համավարակի և ամիսներ շարունակ ձգձգվող արտակարգ դրության պայմաններում կոռուպցիայի դեմ պայքարի նմանօրինակ գործարք կնքելու անհրաժեշտությունը կար հարցին Գևորգ Գևորգյանը պատասխանում է. «Չեմ ուզում այս հարցը կապել երկրի ներքին կամ արտաքին մարտահրավերներով, առհասարակ ես չեմ կարծում, որ այսպիսի գործարքի կարիքը կար մեր երկրի համար։ Չմոռանանք, որ այս պահի դրությամբ մեր երկրի առաջ շատ ավելի առաջնային խնդիր կան ծառացած՝ սկսած առողջապահական, կրթական և տնտեսական խնդիրներից, մինչև արտաքին մարտահրավերները։ Հատկապես հաշվի առնելով նաև այն հանգամանքը, որ իրեն կոռուպցիայի դեմ պայքարի առաջամարտիկ հայտարարած նույն ԱՄՆ-ն ինքը շատ հեռու չէ կոռուպցիոն սխեմաներից։ Պետք է ընդունենք, որ նրանք շատ ավելի կոռումպացված են, քան մենք իրականում, հետևաբար իրենց այս միջամտությունը մեր երկրի ներքաղաքական կյանքին ես պայմանավորում եմ վերջին երկու տարում մեր իշխանությունների որդեգրած անհասկանալի կեցվածքով՝ գուցե հաճոյանալու կամ սիրաշահելու արևմուտքին և սա ամենալավագույն դեպքում։ Վատագույն սխեմաների մասին կցանկանայի այս պահին չխոսել»։

Հեղինակ՝ Նվարդ Մանվելյան

Աղբյուր` Փաստինֆո