Փաստ ինֆո

Արտակարգ դրություն հայտարարելուց հետո մարտ-մայիս ամիսների ընթացքում ընտանեկան բռնության վերաբերյալ ահազանգերն ավելացել են 30 տոկոսով։ Այս մասին «Փաստինֆո»-ի հետ զրույցում ասաց իրավապաշտպան, «Ընդդեմ կանանց նկատմամբ բռնության կոալիցիա»-ի հանրային կապերի մասնագետ Զառա Հովհաննիսյանը։

Նա նշեց, որ մարտ-մայիս ամիսներին «Ընդդեմ կանանց նկատմամբ բռնության կոալիցիա»-ի թեժ գծերի ահազանգերն ավելացել են 50 տոկոսով, որից 30 տոկոսը վերաբերում են ընտանեկան բռնության դեպքերին, իսկ մյուս մասը կապված են սոցիալական խնդիրների հետ։

Զառա Հովհաննիսյանն ընդգծեց՝ լարված իրավիճակը նպաստում է ընտանեկան բռնությունների աճին։ Շատերն աշխատանքն են կորցրել և սոցիալական խնդիրները նույնպես լարվածության պատճառ են հանդիսանում։ Այնուամենայնիվ Զառա Հովհաննիսյանը նշեց, որ փորձում են ահազանգած կանանց աջակցություն ցուցաբերել. «Մեր ապաստարանային ծառայությունը շարունակում է իրականացնել իր աշխատանքները։ Կարանտինի 14-օրյա ժամկետի հետ կապված խնդիր ունենք, քանի որ կինը, որն առաջին անգամ է գալիս ապաստարան, պետք է մեկուսացվի և տեղի խնդիրն այդ առումով լուծված չէ։ Պետությունը որևէ կերպ չաջակցեց, որպեսզի առանձին կացարանային հնարավորություն տրվի այդ կանանց որոշակի ժամանակ պահելու համար։ Ամեն դեպքում կարողանում ենք մեր միջոցներով, մեր հնարավորությունների շրջանակներում բոլորին աջակցել»,-ասաց Զառա Հովհաննիսյանը։

Իրավապաշտպանն ասաց, որ ապաստարանային ծառայությունը ծանրաբեռնված է աշխատում։ Երկու ապաստարան ունեն, որոնք միաժամանակ կարող են տեղավորել 10 կնոջ իրենց երեխաների հետ։

Հարցին՝ արդյոք եղել են դեպքեր, որ ընտանեկան բռնության հետ կապված հարևաններն ահազանգեն, Զառա Հովհաննիսյանն ասաց, որ հարևանները հիմնականում ոստիկանություն են զանգահարում, որտեղից էլ իրենց աջակցության կենտրոն ուղղորդումները շատ են եղել։ Գործում են նաև աջակցության կենտրոնի հոգեբանական աջակցության թեժ գծերը. «Իրավիճակը լարված է, բոլորը տանն են, իսկ կանանց հոգսերն ավելի են մեծացել։ Ամեն ինչ նպաստում է ընտանեկան բռնությունների աճին։ Եղել են դեպքեր, որ կանայք տնից դուրս են եկել ու քայլելով հասել՝ աջակցություն ստանալու։ Այսպես ասած՝ փախել են տնից»,-հավելեց իրավապաշտպանը։

Մարտ ամսին աջակցության կենտրոնի թեժ գիծը ստացել է 803 ահազանգ, որից 172-ը վերաբերել է ընտանեկան բռնությանը, ապրիլին ահազանգերի թիվը եղել է 752, որից 250-ը՝ ընտանեկան բռնության դեպքերը, իսկ մայիսին կենտրոնը ստացել է 915 ահազանգ, որից ընտանեկան բռնության դեպքերին է վերաբերել 256 զանգ։

Աղբյուր` Փաստինֆո