Փաստ ինֆո

Կառավարության շենքի դիմաց երեկվա ցուցարարների պահանջները ֆինանսական և սոցիալական էին,- «Փաստինֆո»-ի հետ զրույցում ասաց Հանրային ոլորտի փորձագետ Աշոտ Բարսեղյանը։ Վարչապետի մամուլի քարտուղարի մեկնաբանությունը զայրացրել է իրենց և եզրակացրել են, որ իրենք քաղաքականության զոհ են.

«Երեկվա մեր՝ կառավարության ներկայացուցչին հանդիպելու ցանկությունից հետո տեղեկացանք, որ լուրերի հարցմանն ի պատասխան արձագանքել է Վարչապետի մամուլի քարտուղար Մանե Գևորգյանը։ Ասել է ոլորտին ավելի զայրացնող բան, որ եթե նույնիսկ վերացնեն արտակարգ դրությունը, միևնույնն է պահպանվելու է արգելքը ՝ միջոցառումներ, համերգներ, հարսանիքներ իրականացնելու։ Սա մեզ դրդում է մի եզրակացություն անել, որ ոլորտի 20.000 ներկայացուցիչ քաղաքականության զոհ է դառնում։ Մենք գործ չունենք քաղաքականության հետ։ Մարդիկ մարտից գումար չեն աշխատում և կառավարության խոսնակն ասում է գիտեք ինչ՝ մենք չգիտենք որ պատճառով (ես տողատակերն եմ ասում), բայց մենք կարող ենք ևս ձեր գործունեության արգելքը պահպանել։ Սա հարիր պատասխան չէ պետական պաշտոնյայի։ Եվ մամուլի խոսնակի արձագանքին չէի սպասում։ Ես սպասում եմ տնտեսական բլոկի պատասխանատուներին, որովհետև կործանվում է մի ամբողջ ոլորտ»,- ասաց Աշոտ Բարսեղյանը։

Ըստ նրա՝ հուլիսի 9-ին կառավարության մոտ տեղի ունեցած հավաքը ինքնաբուխ էր։ Իմանալով, որ հնարավոր է իրենց բերման ենթարկեն, մարդիկ միևնույնն է եկել էին իրենց բողոքն արտահայտելու։

«Ինքներդ տեսաք, որ մարդիկ չեն էլ վախենում ձերբակալություններից։ Իրենց ասելով՝ կորցնելու բան չունեն։ Եթե 5 ամիս իրար պարտք տալով և վերցնելով են ապրում, ապա ի՞նչը կարող է իրենց կանգնեցնել։ Մեկ անգամ էլ դիմելու եմ կառավարության տնտեսական թևին՝ հասկանալու խորացող տնտեսական ճգնաժամի պայմաններում արդյո՞ք բացի դիմակից, ինչ -որ գործողություններ կատարվում են, և արդյոք ձևավորվում է տնտեսական հայեցակարգ՝ ոլորտները և տնտեսությունը ընդհանուր առմամբ ճգնաժամից հանելու համար»։

Դեռ համավարակի տարածման սկզբից Աշոտ Բարսեղյանի խոսքով ռեստորանային ոլորտի աշխատակիցները կոչ են արել և պատրաստ ենք եղել կարանտինի, բայց նման սցենար չեն կանխատեսել։

«Ենթադրվում էր, որ այդ ընթացքում կառավարությունը և բոլոր ներգրավված մարմինները կանեն իրենց հասանելիք ամեն ինչ, որպեսզի համավարակի հետ պայքարը չտապալվի, բայց Հայաստանը գնաց այլ ճանապարհով և մենք չենք որդեգրել երկու հայտնի մոդելներից ոչ մեկը՝ ոչ բաց, ոչ փակ, մենք գնում ենք մեջտեղով՝ զոհաբերելով մեր տնտեսությունը՝ անհասկանալի քաղաքականությանը»,- ասաց բանախոսը՝ ավելացնելով, որ առողջապահական ոլորտի դրական արդյունքների բացակայությունը խիստ բացասական է անդրադառնում տնտեսության վրա։

«Եթե կա արտակարգ դրության երկարաձգման հայտարարություն, ապա դա միայն առողջապահական համակարգում պետք է լինի։ Վերջիվերջո սա առողջապահական խնդիր է։ Սա իմ խորին համոզմամբ «մեդիա փուչիկ է» և ԱՀԿ-ի հայտարարությունները մեր նախարարը խեղաթյուրելով, փոխելով իր նպատակին է ծառայեցնում, ինչպես դա արեց հակածխախոտայինի ժամանակ, հիմա COVID-ի ժամանակ է անում, հետո հակաալկոհոլային նախագծով է մանիպուլյացիա անելու»,- նշում է Ա.Բարսեղյանը։

Հանրային ոլորտի փորձագետի կարծիքով՝ արտակարգ դրության երկարացումը մտացածին և փրկօղակի պես բան է համարում, որին զոհաբերվում է երկրի տնտեսությունը. «Ուզում եմ հասկանալ հանրապետության կառավարության տնտեսական բլոկը ինչքան ժամանակ է թույլ տալու առողջապահության նախարարին խառնվել տնտեսական կյանքին՝ բացասական իմաստով։ Միևնույնն է չկա մահացությունների այն սարսափելի մակարդակը, որի մասին մեզ գուժում էին»։

20.000 անձ մնացել է անգործ։ Բարսեղյանի կարծիքով մարդիկ չեն վախենում բերման ենթարկվելուց։

«Միևնույնն է 10 հոգու բերման ենթարկեցին։ Ինչպե՞ս սա գնահատենք։ Լավ բերման ենթարկեցիք, արձանագրությունները կազմեցիք, գնացին տուն։ Ոչ ոք չի ահաբեկվել և վախեցել, մարդիկ տուն գումար չեն տանում և դա է իրենց համար ահաբեկված վիճակ, քան մեկ-երկու ժամ ոստիկանությունում անցկացնելը»։

Աշոտ Բարսեղյանն ասաց, որ օրենսդրական կարգավորումներ կան, որոնք օրհասական են, բայց հրատապության կանոնակարգով հասարակությանը չհուզող և այս պահին ոչ անհրաժեշտ օրինագծեր են անցկացվում։ «Հարց է առաջանում, գուցե մարդկանց լավ չե՞ն բացատրում տնտեսական ճգնաժամի մոտալուտ ահագնացող վիճակը, թե դա չի անհանգստացնում այդ մարդկանց։ Դա մեզ շատ է անհանգստացնում։ Եթե լինեին կարգավորումներ, դրանք թույլ կտային ռեստորանատերերին չվճարել վարձավճարները, երբ որ դրանք փակ են»,- նշեց նա։

Ըստ Բարսեղյանի՝ միակ լուծումը արտակարգ դրության չեղարկումն է։

«Մենք պետք է համոզենք, որ արտակարգ դրության երկարաձգումը հարված է հասցնում տնտեսությանը՝ հարվածում այնպես, որ մեր գործազրկությունը աշնանը հասնելու է 40 տոկոսի։ Սա մարդկանց կյանքի հարցն է։ Մարդիկ վիրուսից կամ ձերբակալությունից չեն վախենում, բայց վախենում են անգործ մնալուց։ Մարդիկ ուզում են աշխատել ոչ թե նյարդայնանալ։ Սա է երեկվա հետևությունը։ Դիմակ շոուն հասել է անհեթեթ, անտրամաբանական վիճակի»։

Հիշեցնենք, որ Կառավարության շենքի դիմաց բողոքի ակցիա էր։ Հավաքվել են միջոցառումների անցկացման կազմակերպությունները՝ ուզում էին հանդիպել կառավարության ներկայացուցիչներին՝ կապված միջոցառումների անցկացման թույլտվության հետ։ Սակայն հանդիպում տեղի չունեցավ, մասնակիցներից 10-ին բերման ենթարկեցին։

Աղբյուր` Փաստինֆո