Փաստ ինֆո

«Ես շատ խիստ եմ արտահայտվելու այս թեմայի առնչությամբ, - «Փաստինֆո»-ի հետ զրույցի մեկնարկից հայտարարում է քանդակագործ Վիգեն Ավետիսն, անդրադառնալով Երևանի Ֆիրդուսի 33 թաղամասի շուրջ տեղի ունեցող իրադարաձությունների թեմային և հավելում,- Մշակույթի նախարարությունում պետք է հասկանան, որ իրենց կողմից թույլ տված բացթողումներն անդառնալի հետևանքների կարող են հանգեցնել։

Ես չգիտեմ, չեմ հասկանում մենք հիմա Մշակույթի նախարարություն ունե՞նք, թե՞ չունենք։ Հասկացանք, որ մշակույթի ոլորտը կցորդ է դարձել մեկ այլ նախարարության կազմում։ Երբ նախարարությունների միավորման հարցն էր քննարկվում, ես դեմ չարտահայտվեցի դրան, հույս ունենալով, որ, միգուցե այդ կարգավիճակում մշակույթի նախարարության գործառույթները չեն տուժի, բայց մենք ականատեսն ենք մի իրականության, երբ մի ողջ ոլորտ փաստացի չի կարողանում իրականացնել իրեն վերապահված գործառույթները։

Փոխանակ Մշակույթի նախարարությունը քաղաքի պատմական հատվածի քարուքանդը կասեցնելու ուղղությամբ արագ միջոցներ ձեռնարկի, որովհետև դա իր մասնագիտական գործառույթներից մեկն է, մենք տեսնում ենք, որ Քաղաքապետարանն արդեն իսկ գործի է անցել և քանդում է մեր քաղաքի առանց այն էլ քիչ մնացած պատմամշակութային և, առհասարակ, մշակութային արժեք ունեցող կառույցները։ Հիմա ես չգիտեմ՝ Մշակույթի նախարարություն գոյություն ունի՞, թե՞ չունի»։

«Փաստինֆո»-ի այն դիտարկմանը, որ շատ դեպքերում քաղաքում վերացվող հուշարձանների կամ պատմական նշանակության այս կամ այն կառույցի քանդմանը նպաստում է հենց Մշակույթի նախարարությունը՝ համապատասխան փաստաթղթերի տակ դնելով իր թույլտվությունը խորհրդանշող հաստատումը, Վիգեն Ավետիսը պատասխանում է. «Թող նրանք չփորձեն թաքնվել արդարացումների կամ որևէ այլ բանի հետևում, որովհետև այն, ինչ այդ նախարարությունն է անում՝ դրանք հստակ գործարքներ են, ավելի հստակ՝ առք ու վաճառքի գործարքներ։ Գիտե՞ք ինչ կասեմ՝ ինձ համար Պաշտպանության նախարարությունից հետո, ստրատեգիական կարևորության հաջորդ ոլորտը Մշակույթի նախարարությունն է։ Իսկ, եթե մենք հիմա ֆիքսում ենք, որ մշակույթի ոլորտը պատշաճ կերպով համակարգող գերատեսչություն չուենենք, ուրեմն եկեք ֆիքսենք նաև, որ մեզ մշակույթ պետք չէ»։

Աղբյուր` Փաստինֆո