Փաստ ինֆո

«Հայաստանի էլեկտրական ցանցեր» ՓԲԸ-ն տուգանվել է։ Այս մասին տեղեկանում ենք Հանրային ծառայությունները կարգավորող հանձնաժողովի կայքէջից։

Հանրային ծառայությունները կարգավորող հանձնաժողովի ձևավորված աշխատանքային խումբը 2020 թվականի մայիսի 4-8-ը «Հայաստանի էլեկտրական ցանցեր» փակ բաժնետիրական ընկերության կողմից առանձին սպառողներին առաքված էլեկտրաէներգիայի քանակի հնարավոր հավելագրումների փաստի ուսումնասիրության նպատակով ընկերության «Արարատ», «Աշտարակ» և «Աբովյան» էլեկտրական ցանցերում իրականացրել է մոնիթորինգ: Մասնավորապես, իրականացվել է թվով 720 սպառողների առևտրային հաշվառքի սարքի զննում և փաստացի ցուցմունքների գրանցում, որոնք համեմատվել են 2020 թվականի մայիսի 1-3-ը ժամանակահատվածում ընկերության աշխատակիցների կողմից ցուցմունքների ֆիքսման բլանկներով գրանցված միևնույն առևտրային հաշվիչների ցուցմունքների հետ։ Ուսումնասիրության արդյունքում պարզվել է, որ ընկերության աշխատակիցների կողմից 2020 թվականի մայիսի 1-3-ը ժամանակահատվածում ցուցմունքների ֆիքսման բլանկներում գրանցված թվով 33 հաշվիչներով արձանագրված ցուցմունքերն ավելի մեծ են, քան 2020 թվականի մայիսի 4-8-ը ժամանակահատվածում աշխատանքային խմբի կողմից նույն առևտրային հաշվիչներից կարդացված ցուցմունքերը։

Թվով 35 էլեկտրոնային հաշվիչներ ցույց են տվել սխալ օր,ամիս, տարի և ժամ, էլեկտրաէներգիայի հաշվառման և վերահսկման ավտոմատացված համակարգում ընդգրկված թվով 48 էլեկտրոնային հաշվիչներ չեն գրանցել նախորդ ամսվա ծախսը, թվով 7 հաշվիչներ ընդհանրապես ներառված չեն եղել ցուցմունքների ֆիքսման բլանկներում, փոխադարձ հաշվարկների ստուգման ակտ և հետևաբար առանձին հաշվառման քարտ չունեն, 5 առևտրային հաշվիչների սեղմակաշարերի կափարիչները կնքված չեն եղել, 5 առևտրային հաշվառքի սարքի հոսանքի տրանսֆորմատորները կնքված չեն եղել, 125 առևտրային հաշվիչների վրա բացակայել են սեղմակաշարերի կափարիչները և հետևաբար նաև կնիքները։

Հանձնաժողովը գտել է, որ այդ խախտումներն ուղղակիորեն հանգեցրել են մի խումբ սպառողների իրավունքների խախտմանը։ Հիմք ընդունելով «Էներգետիկայի մասին» օրենքի 42-րդ հոդվածի 1-ին և 6-րդ մասերը հանձնաժողովը որոշել է կանոնների 37-րդ, 41-րդ և 43-րդ կետերի պահանջները խախտելու համար ՀԷՑ-ին տուգանել 10 մլն դրամի չափով՝ ընկերությանը պարտավորեցնելով երկամսյա ժամկետում իրականացնել 142 առեւտրային հաշվիչների սեղմակաշարերի կափարիչների տեղադրում եւ կնքում, 176 հաշվիչների սեղմակաշարերի կափարիչների կնքում, 63 հաշվիչների մայիսի 1-3-ն ընկած ժամանակահատվածում արձանագրված ցուցմունքների եւ ծախսերի անհամապատասխանությունների ուղղում, ինչպես նաեւ մեկամսյա ժամկետում ներկայացնել արձանագրված խախտումների բացառմանն ուղղված առաջարկություններ։

Աղբյուր` Փաստինֆո