Փաստ ինֆո

Ոչ բոլոր դատավորներն են, որ ունենում են այն մոտեցումը, որ հենց գործի սկզբնական փուլում՝ որոշ հիմքերի պայմաններում, դադարեցնում են քրեական հետապնդումը։ Այս մասին լրագրողների հետ զրույցում ասաց ԱԺ նախկին նախագահ Արա Բաբլոյանի փաստաբան Արամ Վարդևանյանը՝ անդրադառնալով դատարանի որոշմանը։ 

«Բոլորդ հիշում եք Դավիթ Գրիգորյանի վերաբերյալ դատավոր Դավիթ Բալայանի որոշումը։ Հենց նույն տրամաբանությունն էր գործում, որովհետև եթե քրեական գործում կան այնպիսի հանգամանքներ, որոնք ինքնին բացառում են դրա տրամաբանությունը հետագա դատաքննության փուլում, հենց այս փուլում պետք է դադարեցվի։ Վկաներ պետք է գան, դատարանը պետք է նիստեր անի, պաշտպանները մասնակցեն և ըստ էության դրանք ռեսուրս են հանդիսանում։ Եթե քրեական գործն ունի այնպիսի ճեղքվածք, այնպիսի թերություն, որ անիմաստ է դարձնում, իհարկե այս փուլում պետք է դադարեցվի»,-ասաց Արամ Վարդևանյանը՝ ընդգծելով, որ այս քրեական գործը կառուցված է օրենքի մեկնաբանման նեղ, սուբյեկտիվ վերլուծության վրա։ Փաստաբանի խոսքով ՀՔԾ-ն գտել է, որ պետք է հին կանոնակարգը գործեր և դրանից ելնելով մեղադրանք է առաջադրել։

Հարցին՝ եթե ցուցմունք չկա, առերեսում չի եղել, ապա ինչ վկաներին լսելու մասին է խոսքը, Արամ Վարդևանյանն ասաց, որ ամեն դեպքում դատակոչված են մարդիկ և պետք է լսել. «Եթե Արա Բաբլոյանի դեմ լիներ գեթ մեկ ցուցմունք, ապա կլիներ առերեսման հարց։ Մի քանի անգամ Արա Բաբլոյանը հարցաքննության է եղել։ Դրանից հետո հարցաքննվել են ԱԺ աշխատակիցներ, այդ թվում իրավաբանները, և բոլորը նույն կերպ պնդել են, որ ԱԺ նոր կանոնակարգն էր կիրառելի, և Արա Բաբլոյանը որևէ առնչություն չի ունեցել կիրառման նորմը որոշելու հարցում»,-նշեց փաստաբանը։

Աղբյուր` Փաստինֆո