Փաստ ինֆո

ՀՀ նախկին փոխվարչապետ Արմեն Գևորգյանին՝ սահմանը հատելն արգելելու ոստիկանության ծառայողների գործողությունների վերաբերյալ քրեական գործ չի հարուցվի։ «Փաստինֆո»-ի հետ զրույցում ասաց Արմեն Գևորգյանի պաշտպան Էրիկ Ալեքսանյանը տեղեկացրեց, որ ՀՔԾ-ն մերժել է քրեական գործի հարուցումը՝ պատճառաբանելով, թե ՀՀ ոստիկանությունը,, իբր իրավացիորեն ղեկավարվել է կառավարության որոշմամբ, ըստ որի՝ անձի ազատ տեղաշարժի վերաբերյալ համակարգ մուտքագրված սահմանափակումը կարող է հանվել բացառապես այն դեպքում, երբ առկա է վարույթն իրականացնող մարմնի որոշումը՝ խափանման միջոցը վերացնելու մասին։ 

Փաստաբանի գնահատմամբ՝ ՀՔԾ որոշումն ակնհայտ ապօրինի է՝ մատնանշելով երկու պարզ պատճառ։

«Նախ, այն դեպքում, երբ սահմանափակումներ մուտքագրելու կամ հանելու տերմիններ են օգտագործվում պետք է օգտվել ավելի բարձր իրավաբանական ուժ ունեցող նորմատիվ իրավական ակտի՝ քրեադատավարական օրենքի լեզվից, իսկ տվյալ դեպքում ՀՀ դատավարության օրենսգիրքը որպես ավելի բարձր իրավաբանական ուժ ունեցող նորմատիվ-իրավական ակտ սահմանում է, որ չհեռանալու մասին ստորագրություն տված կասկածյալը կամ մեղադրյալը կարող են հետաքննության մարմնի, քննիչի, դատախազի կամ դատարանի թույլտվությամբ մեկնել այլ տեղանք կամ փոխել բնակության վայրը անգամ խափանման միջոցը չվերացված լինելու պայմաններում։ Հետևաբար` պետք է կիրառվեր նշված օրենքի դրույթները, այլ ոչ թե ՀՀ կառավարության որոշումը: Անգամ իրավաբանական ֆակուլտետի 1-ին կուրսի ուսանողները գիտեն, որ ենթաօրենսդրական ակտը տվյալ դեպքում կառավարության որոշումն ավելի նվազ իրավաբանական ուժ ունի, քան օրենքը՝ տվյալ դեպքում ՀՀ քր. դատ օրենսգիրքը, ինչևէ»,-ասաց Ալեքսանյանը։

Նշենք, որ ՀՔԾ որոշման մեջ վկայակոչված է ՀՀ կառավարության որոշումը, մասնավորապես, որ տվյալ իրադրության պայմաններում ոստիկանության ծառայողները ՀՀ կառավարության թիվ 884-Ն որոշման պահանջներով սահմանված կարգով ՍԷԿՏ համակարգի տեխնիկական հնարավորությունների սահմաններում կարող էին մուտքագրել բացառապես ստորագրություն չհեռանալու մասին խափանման միջոցը կիրառելու կամ նշված խափանման միջոցը վերացնելու մասին տվյալներ, ինչը տվյալ պարագայում խափանման միջոցի վերացված չլինելու պայմաններում չէին կարող կատարել, այսինքն՝ ոստիկանության ծառայողները գործել են առանձին ենթաօրենսդրական ակտով սահմանված իրենց պաշտոնեական լիազորությունների սահմաններում։

Բացի այդ՝ Ալեքսանյանն ընդգծեց, որ ՀՔԾ տրամադրության տակ առկա էին նաև իրենց կողմից տրամադրված մեկ այլ քրեական գործով դատարանի գրությունը, համաձայն որի՝ դատարանը թույլատրել է անձին մեկնել այլ տեղանք՝ առանց նրա խափանման միջոցը վերացնելու և ոստիկանությունը որևէ խոչընդոտ այդ դեպքում չէր առաջացրել։

«Այսինքն՝ չի ասել, քանի որ խափանման միջոցը չի վերացվել, չենք թողնում։ Կրկնում եմ՝ շատ հանգիստ ոստիկանությունը թույլատրել է, որ այդ անձը սահմանը հատի և ՀՔԾ-ն ուղղակի պարտավոր էր այդ տարբերակված մոտեցումը քննության առարկա դարձնել, քանի որ հենց դրանում է ընդգծվում հանցակազմի տարրի առկայությունը, սակայն չի արել»,- նշեց պաշտպանը։

Նրա խոսքով՝ ՀՔԾ որոշման դեմ պատրաստվում են բողոք ներկայացնել, թեև կարծում են, որ դատախազը կմերժի այն, քանի որ վստահ են, որ հենց դատախազն է գրել այդ որոշումը կամ էլ ՀՔԾ քննիչը դատախազի հետ համաձայնեցված է գրել որոշումը։

«Մերժումը ստանալուց հետո այն, անշուշտ, կբողոքարկենք դատարան և այդ ժամանակ կներկայացնենք նաև այլ փաստեր, որոնց ծանոթանալուց հետո, կարծում եմ, քննիչն ու դատախազը իրավաբանական ինֆարկտ են ստանալու»,- ընդգծեց Ալեքսանյանը։

Ավելի վաղ տեղեկացրել ենք, որ Արմեն Գևորգյանին ՀՀ սահմանը հատելը չթույլատրելու կապակցությամբ փաստաբան Էրիկ Ալեքսանյանը ՀՀ գլխավոր դատախազին հաղորդում էր ներկայացրել, որով խնդրել էր իրավական գնահատականի արժանացնել ՀՀ ոստիկանության քրեական հետախուզության գլխավոր վարչության ծառայողների գործողությունները, իսկ քրեական գործ հարուցելու առիթի օրինականության և հիմքերի բավարար լինելու դեպքում՝ հարուցել քրեական գործ: Սակայն ՀՀ գլխավոր դատախազությունը այնուհետև՝ նաև առաջին ատյանի դատարանը գտել էին, որ Ալեքսանյանի կողմից ներկայացված հաղորդումը վերացական է և չի պարունակում կոնկրետ տվյալներ՝ հանցագործության հատկանիշների մասին: Երևանի ընդհանուր իրավասության դատարանի որոշման դեմ փաստաբանը վերաքննիչ բողոք էր ներկայացրել, որը 2020թ փետրվարի 18-ին բավարարվել էր՝ բեկանելով Երևանի ընդհանուր իրավասության դատարանի որոշումը՝ վարույթն իրականացնող մարմնին պարտավորեցնելով վերացնել Արմեն Գևորգյանի իրավունքների խախտումը։ ՀՀ գլխավոր դատախազ Արթուր Դավթյանը Վերաքննիչ դատարանի որոշման դեմ վճռաբեկ բողոք էր ներկայացրել, սակայն Վճռաբեկ դատարանը մերժել է վարույթ ընդունել բողոքը, ինչը նշանակում է, որ Վերաքննիչ դատարանի որոշումը մտել է օրինական ուժի մեջ և այդպիսով ՀՔԾ-ն պարտավոր էր նյութեր նախապատրաստել՝ պարզելու, թե արդյո՞ք ՀՀ նախկին փոխվարչապետ Արմեն Գևորգյանին՝ սահմանը հատելն արգելած ոստիկանության ծառայողների գործողություններում առկա են հանցագործության հատկանիշներ, թե ոչ։

Հեղինակ՝ Իզաբել Սահակյան

Աղբյուր` Փաստինֆո