Փաստ ինֆո

Համոզված եմ՝ Էդգար Սողոմոնյանին ճնշել են, դրդել, համոզել, որ նա իրենց համար ցանկալի բովանդակությամբ, իրականությունից տարբերվող ցուցմունք տա։ Այս մասին Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ քննվող «Սասնա Ծռեր-1» գործով դատական նիստին ասել է ամբաստանյալ Գագիկ Եղիազարյանը՝ նշելով, որ ապրել է այդ միջավայրում, խցում ծանոթ է ներքին շատ բաների։

Նրա փոխանցմամբ՝ կալանավորումից 3,5 ամիս հետո իրեն տեղափոխել են այլ խուց, որտեղ եղել է մի անձնավորություն, որը որոշում էր, թե խցակիցներից յուրաքանչյուրն ինչով պետք է զբաղվի և փորձել է իր նկատմամբ ևս ճնշումներ գործադրել։
Եղիազարյանի խոսքով՝ նա պատմել է, որ այդտեղ եղել էր նաև Էդգար Սողոմոնյանը և հենց նա է ազդեցություն ունեցել Սողոմոնյանի ցուցմունքների վրա։

«Նա հենց այդ մեխանիզմի մի օղակն էր, որը բարոյական ճնշումների միջոցով, հետո էլ բարի քեռի ներկայանալով, ուղղորդում էր։ Նա ազդեցություն է ունեցել Էդգարի տված ցուցմունքների վրա։ Նույնը փորձել է անել ինձ հետ, շատ առաջ չի գնացել, տեսել է, որ հաջողության չի հասնում, առաջ գնալու իմաստ արդեն չկար։ Իմ տպավորությունն այն էր, որ Էդգարի դեպքում հասել է հաջողության՝ ստեղծելով դժոխային պայմաններ նրա համար»,-ասաց ամբաստանյալը։

Նշենք, որ համաներմամբ Էդգար Սողոմոնյանի նկատմամբ քրեական հետապնդումը դադարեցվել է։ Եղիազարյանն իր ցուցմունքում նաև անդրադարձավ Գագիկ Մկրտչյանի մահվան հանգամանքներին՝ պատմելով, որ նրա ուղղությամբ ինչ որ տեղից կրակոցներ են արձակվել, վիրավորվել է թևից, սակայն չի տեսել վիրավորվելու պահը։ Նա նշեց, որ իր տեսածների հիման վրա պատկերացումներ ունի և կարծում է, որ Էդվարդ Գրիգորյանը չէր կարող լինել, քանի որ դեպքից շատ կարճ ժամանակ առաջ ինքը տեսել է Էդվարդ Գրիգորյանին՝ Մխիթարի ճակատը վիրակապելիս։ Ամբաստանյալի հարցաքննությունից հետո դատարանն ընդմիջում հայտարարեց։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։
Հեղինակ՝ Իզաբել Սահակյան

Աղբյուր` Փաստինֆո