Փաստ ինֆո

ԿԸՀ-ն մերժեց «Լուսավոր Հայաստան» խմբակցության ղեկավար Էդմոն Մարուքյանի դիմումը, որով պահանջում էր վերականգնել իր գլխավորած խմբակցության մեկ մանդատը։ Դիմումով Մարուքյանը հիշեցրել էր, որ ընտրությունների արդյունքով իրենք ստացել են 18 մանդատ, սակայն այնուհետև Արման Բաբաջանյանը դուրս է եկել խմբակցությունից և դարձել անկախ պատգամավոր, և նման կերպ ԼՀԿ-ն զրկվել է իրեն տրված 18 մանդատներից մեկից:

«Ըստ էության ստեղծվել է մի իրավիճակ, որը հակասում է ժողովրդի կամարտահայտությանը։ ԼՀԿ-ն 18 մանդատ փաստացի չունի։ Առաջանում է ճգնաժամային իրավիճակ և պետք է վերականգնվի այդ հարաբերակցությունը»,- ասաց «Լույս» դաշինքի ղեկավար Դավիթ

Խաժակյանը։
ԿԸՀ նախագահը փաստեց, որ ընտրության արդյուքներով ամփոփման ժամանակ սահմանված 132 թիվը ավելանալու է մեկով.

«Ընտրությունից հետո բաշխելով և կիրառելով լրացուցիչ մանդատներ տալու ինստիտուտը, տրամադրվել են մանդատներ որոնց թիվը 132-ն է։ Այս որոշումը մինչ օրս գործող է։ Եթե պահանջում եք լրացուցիչ մանդատ, նշանակում է ընտրության արդյունքներով ամփոփման ժամանակ սահմանված 132 թիվը դառնալու է 133 »,- ասաց ԿԸՀ նախագահ Տիգրան Մուկուչյանը։

Դավիթ Խաժակյանը այս հարցին երկու լուծում էր առաջարկում՝ կամ հավելումներով տեղի ունենա մանդատի ավելացումը կամ վերականգնման։ Որպես ընդդիմադիր խմբակցություն, իրենք պահանջում են 18 մանդատ, գտնում են, որ իրավիճակը հղի է և իրավական և քաղաքական ճգնաժամով։ «Սա պետք է դառնա նախադեպային գործընթաց»,- ասաց Խաժակյանը։

Մինչդեռ ԿԸՀ-ն արդեն իսկ ընտրված ԱԺ-ի և բաշխված մանդատների պայմաններում լրացուցիչ մանդատների տրամադրելու լիազորությամբ օժտված չէ։ «Կուսակցության տարածքային կամ համապետական ընտրական ցուցակի հերթական հաջորդ թեկնածուին՝ ԿԸՀ արձանագրությանբ տրվում է լիազորությունները վաղաժամ դադարած պատգամավորի մանդատը, ինչը նշանակում է, որ եթե որևէ պատգամավորի լիազորությունները վաղաժամ դադարեցված չեն, ապա առկա չէ այն իրավական փաստը, որի հիմքով ԿԸՀ-ն իր արձանագրությամբ այդ մանդատը կարող է տրամադրել մեկ այլ թեկնածուի։ Այսինքն ԿԸՀ կողմից մանդատը տրամադրելու լիազորությունը հնարավոր է իրականացնել բացառապես թափուր մանդատի դեպքում »,- հայտարարեց ԿԸՀ նախագահը։

Հիշեցնենք, որ նախորդ տարվա սեպտեմբերին Արման Բաբաջանյանը դադարեցրեց իր անդամակցությանը «Լուսավոր Հայաստան» խմբակցությանը:

Աղբյուր` Փաստինֆո