Փաստ ինֆո

Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, «Սասնա ծռեր-1» գործով ամբաստանյալների պաշտպան Տիգրան Եգորյանի վարքագիծը գնահատել է որպես պաշտպանական իրավունքի չարաշահում։

«Փաստինֆո»-ի հաղորդմամբ՝ այսօրվա գործով դատական նիստը ընդմիջումից հետո հետաձգվել է՝ պաշտպանների անհարգալից վերաբերմունքի պատճառով։ Նշենք, որ մինչ այդ Տիգրան Եգորյանը, ով սույն գործով ամբաստանյալներ Գագիկ Եղիազարյանի և Վարուժան Մկրտչյանի պաշտպանն է, Գագիկ Եղիազարյանի հարցաքննությունից հետո 40 րոպե տևողությամբ ընդմիջում էր խնդրել, սակայն սահմանված ժամանակահատվածում չի ներկայացել դատական նիստին։

Նախագահող դատավոր Մեսրոպ Մակյանը հայտարարեց, որ ընդմիջման ընթացքում դատարանը ստացել է Եգորյանի միջնորդությունը, որով վերջինս տեղեկացրել է, որ դատական նիստից կուշանան 20-30 րոպե։ Փաստաբանը դատարանին տեղեկացրել էր, թե 40 րոպե ընդմիջումը խնդրել էին՝ ենթադրելով, որ հնարավորություն կունենան աշխատելու դատական նիստերի դահլիճում՝ ընդմիջման ժամանակ, սակայն կարգադրիչները խնդրել են դուրս գալ, ինչի արդյունքում ստիպված են եղել պաշտպաններով իջնել և դատարանի հարակից տարածքում գտնվող սրճարանում աշխատանքային քննարկում իրականացնել։

Մեղադրող դատախազը հայտարարեց, որ այդ պատճառաբանությունը և վերջիններիս բացակայությունը չի կարող համարվել հարգելի, տուժող կողմը եւս նշեց, որ սա եզակի դեպք չէ եւ Եգորյանը, որպես կանոն, դատական նիստերին գալիս է կես ժամ ուշացումով։
Նախագահող դատավոր Մեսրոպ Մակյանն արձանագրեց, որ դատարանը որևէ պարտավորություն չունի որևէ մեկին, մասնավորապես դատավարության մասնակիցներին դահլիճ տրամադրել, որպեսզի խորհրդակցություն, քննարկում իրականացնեն։ Մակյանը նշել է, որ պաշտպանները նիստից նիստ բավարար ժամանակ ունեն հանդիպելու, քննարկելու և մարտավարություն մշակելու համար։

«Դատարանն այս վարքագիծը, հատկապես պարոն Եգորյանի կողմից, դիտարկում է արդեն պաշտպանական իրավունքների չարաշահում։ Բացի սա, վերջինս ուշանում է դատական նիստերից, արժանանում դատական սանկցիայի, բայց ոճը նորից շարունակվում է։ Դատարանը գտնում է, որ պարոն Եգորյանի կողմից ուշացումներն արհեստականորեն գործը ձգձգելու միտում է հետապնդում։ Սա առնվազն անհարգալից վերաբերմունք է դատարանի, դատավարության մասնակիցների նկատմամբ»,- ասաց դատավոր Մակյանը։
Դատարանը որոշեց հետաձգել գործի քննությունը ու չսպասել նրանց, քանի որ նման պարտավորություն չունի։ Միաժամանակ արձանագրվեց, որ նրանց վարքագծին կանդրադառնան հաջորդ նիստին՝ նրանց բացատրությունները լսելուց հետո։
Հաջորդ դատական նիստը նշանակվել է հուլիսի 15-ին, որի ընթացքում ցուցմունք կտա ամբաստանյալ Վարուժան Ավետիսյանը, որի հարցաքննությունը նախատեսված էր այս դատական նիստին։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո