Փաստ ինֆո

ՀՀ երկրորդ նախագահ Ռոբերտ Քոչարյանի փաստաբանական թիմը չի մեկնաբանում Պողոս Պողոսյանի սպանության գործով ՀՀ երկրորդ նախագահ Ռոբերտ Քոչարյանի նախկին թիկնապահ Աղամալ Հարությունյանի վերաբերյալ դատավճիռը բեկանելու Վերաքննիչ քրեական դատարանի որոշումը։

Ցանկացած քրեական գործ պետք է դիտարկել առանձին, ցանկացած քրեական գործով, երբ կլինեն առաջադրված մեղադրանքներ՝ ինչ-որ կոնկրետ մարդկանց, կունենան համապատասխան պաշտպաններ, իրենցից կարող ենք ճշտել, թե ինչպես են վերաբերվում։ «Փաստինֆո»-ի հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Օրբելյանը։

«Վերաքննիչ քրեական դատարանը քննել է դատախազության դիմումը, բեկանել է դատավճիռը և գործն ուղարկել դատարան՝ նոր քննության, իսկ թե ինչ է ներկայացվել, ինչ ապացույցներ են ներկայացվել, ում մասով է գործը քննում, այս պահին կդժվարանամ քննարկել։ Եթե նոր քննության ուղարկելուց հետո համապատասխան գործընթացներ կլինեն, մեղադրանքներ կառաջադրվեն, ինչ-որ մարդիկ կներգրավվեն, ես էլ ներգրավված կլինեմ, միանշանակ կհայտնեմ իմ դիրքորոշումը՝ և՛ տեղի ունեցած գործընթացի, և հետագայում տեղի ունեցող գործընթացների մասին, բայց այս պահին ունենք ընդամենը հաղորդագրություն, մամուլից եմ տեղեկացել, որ բեկանվել է, ծանոթ չեմ բողոքի բովանդակությանը, գործի նյութերին, ցանկացած մեկնաբանություն իմ կողմից կլինի ոչ պրոֆեսիոնալ, ոչ մասնագիտական»,- ավելացրեց փաստաբանը։

Բացի այդ՝ նա նշեց, որ Պողոս Պողոսյանի գործի քննության ժամանակ ինքը դեռևս Հայաստանում չէր բնակվում, իրավաբան չի եղել և փաստաբանությամբ չի զբաղվել և ընդհանրական տեղեկություններ ունի։

«Համարում եմ, որ իմ կողմից կլինի ոչ պրոֆեսիոնալ այդ ընդհանրական տեղեկատվությունների հիման վրա հիմա պատասխանատու հայտարարություն անելը»,- ասաց Օրբելյանը։

Ավելի վաղ տեղեկացրել ենք, որ Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, կազմով՝ դատավորներ Կարեն Մարդանյանի և Արմեն Բեկթաշյանի, բեկանել է Պողոս Պողոսյանի սպանության գործով դատապարտված Աղամալ Հարությունյանի վերաբերյալ դատավճիռը և գործն ուղարկել առաջին ատյանի դատարան՝ նոր քննության։ Խոսքը գնում է 2001թ. սեպտեմբերի 24-ի լույս 25-ի գիշերը «Առագաստ» սրճարանում քաղաքացի Պողոս Պողոսյանի մահվան վերաբերյալ քրեական գործի մասին. Պողոս Պողոսյանի «Պրիվետ, Ռոբ» արտահայտության պատճառով նրա և անվտանգության աշխատակից Աղամալ Հարությունյանի միջև միջադեպ էր տեղի ունեցել, որի ժամանակ Պ.Պողոսյանն ստացել էր կյանքի հետ անհամատեղելի մարմնական վնասվածք։ 25.09.2001թ. հարուցված քրեական գործով ՀՀ ԱԱ նախարարության աշխատակից Աղամալ Հարությունյանը մեղավոր է ճանաչվել ՀՀ նախկին քրեական օրենսգրքի 103-րդ հոդվածով նախատեսված՝ հանցավոր անփութությամբ անզգուշ սպանություն կատարելու համար: Դատարանը հաստատված է համարել, որ 25.09.2001թ.՝ ժամը 00:30-ի սահմաններում, Երևանի «Առագաստ» սրճարանի զուգարանում վերջինիս և ոգելից խմիչք օգտագործած վիճակում գտնվող Պ.Պողոսյանի միջև տեղի է ունեցել փոխադարձ քաշքշուկ, հասցվել են փոխադարձ հարվածներ, որոնց ընթացքում Պ. Պողոսյանը մեջքի ուղղությամբ վայր է ընկել, գլխի հետևի մասով հարվածել զուգարանի սալիկապատ հատակին, որի հետևանքով ստացած գանգուղեղային ծանր մարմնական վնասվածքից մահացել է: Դատարանի 2002թ. փետրվարի 21-ի դատավճռով ամբաստանյալ Աղամալ Հարությունյանը դատապարտվել է 2 տարի ժամկետով ազատազրկման, միաժամանակ նշանակված պատիժը պայմանականորեն չի կիրառվել և սահմանվել է փորձաշրջան՝ 1 տարի ժամանակով:

Դեպքից տարիներ անց Դատախազությունը դեպքի վերաբերյալ դիմում էր ստացել, որով նոր հանգամանքներ են ներկայացվել միջադեպի ականատես, վկա Սթիվեն Ջոն Նյուտոնի ներկայացուցիչների կողմից։

Դատախազության տարածած հաղորդագրության համաձայն՝ Նյուտոնի հայտարարության ուսումնասիրությամբ պարզվել է, որ հայտարարությունն էական նշանակություն ունեցող այնպիսի տեղեկություններ է պարունակում դեպքի մասին, որոնք առերևույթ վկայում են Պ. Պողոսյանի՝ կյանքից ոչ թե անզգուշությամբ զրկվելու, այլ մի խումբ անձանց կողմից խուլիգանական դրդումներով դիտավորությամբ սպանության մասին: Այսինքն՝ առերևույթ ի հայտ են եկել այնպիսի նոր հանգամանքներ, որոնք կարող են ապացուցել, որ գործով դատապարտված անձը առերևույթ կատարել է ավելի ծանր հանցանք՝ սպանություն ծանրացուցիչ հանգամանքներում, քան այն, որի համար դատապարտվել է: Բացի այդ, դրանք առերևույթ վկայում են հանցանքի կատարմանը նաև այլ անձանց մասնակցության վերաբերյալ:

Հեղինակ՝ Իզաբել Սահակյան

Աղբյուր` Փաստինֆո