Փաստ ինֆո

ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը քիչ առաջ ֆեյսբուքյան իր էջում գրել էր, որ առանց օրինական հիմքի գաղտնալսել ու հրապարակել են իր հեռախոսային մասնավոր խոսակցությունը։ «Փաստինֆո»-ի հետ զրույցում պատգամավորը նկատեց՝ այս ամենը քաղաքական հետապնդման տպավորություն է թողնում։ 

Գևորգ Պետրոսյանը պատմեց՝ օրեր առաջ իրեն անծանոթ համարից զանգ է եկել, պատասխանել է և զանգողը ներկայացել է որպես Ավանի վարչական շրջանի ղեկավարի տեղակալ եւ պատգամավորին զգուշացրել է, որ այսուհետև Նիկոլ Փաշինյանին և Արարատ Միրզոյանին դեմ չարտահայտվի. «Այդ զանգից մի քանի օր առաջ էլ նա իմ անվան վերաբերյալ ֆեյսբուքյան իր էջում գրել էր Գևորիկը և ես այդ զանգի ժամանակ նրան հանդիմանել եմ այն բանի համար, որ ինձանից 8 տարի փոքր լինելով, ինձ իկ-ով է դիմում այն դեպքում, երբ Նիկոլ Փաշինյանն ինձանից երեք տարի փոքր է, բայց ես երբեք ինձ թույլ չեմ տվել որևէ մեկի, այդ թվում նաև նրա հասցեին իկ-ով արտահայտվել, որովհետև երբ մարդու մասին իկ-ով ես արտահայտվում, դա չի նշանակում, որ մեխանիկորեն նրա կշիռը նվազեցնում ես։ Դրա համար նրա հետ այդպես խոսեցի, իսկ հետո հանդիպեցինք և ինձ ասաց, որ իրեն հանձնարարված է՝ զանգել ԱԺ պատգամավորին ու հոխորտալ, որ այլևս այդպիսի գրառումներ, ելույթներ չլինեն։ Նա նաև ասաց, որ ԱԱԾ-ն գաղտնալսել է այդ խոսակցությունը, բայց չեմ ուզում հավատալ դրան»,-ասաց Գևորգ Պետրոսյանը, ով լիահույս է, որ ԱԱԾ-ն հավատարիմ է երկրի Սահմանադրությանը և մյուս օրենքներին և մասնավորապես հիմա նման գործելաոճ չի կիրառի։

Պատգամավորը կարծում է՝ սա ուղղորդված քայլ է. «Հավանաբար իր պաշտոնը պահելու համար ստիպված է եղել այդ խոսակցությունից մի հատված տեղադրել յութուբում։ Բայց նա շատ արագ հասկացավ, որ ի զորու չէ զսպել իմ կարծիքը։ Ես քաղաքական գործիչ եմ և Սահմանադրության համաձայն՝ պատգամավորն ազատ է իր կարծիքն արտահայտել և չի կարող հետապնդվել իր հայտնած կարծիքի կամ քվեարկության համար։ Ի՞նչ իրավունք ունի Երևանի վարչական շրջաններից մեկի ղեկավարի տեղակալը նման նախաձեռնությամբ հանդես գալ։ Թող մտածեն Ավանում եղած խնդիրները լուծելու մասին։ Ակնհայտ է, որ իրենք, իմանալով, որ ես կանգնած եմ իմ քաղաքական ղեկավարի կողքին, ուզում են խոցել, թուլացնել ինձ, բայց նրանց մոտ դա չի հաջողվելու։ Սա քաղաքական հետապնդում է, ուրիշ ոչինչ։ Նման բան չեմ լսել, որ վարչական շրջանի ղեկավարի տեղակալը զանգի և ասի, որ ցուցում ունի կանխարգելել ձեր գործունեությունը։ Սա խայտառակության վերջակետն է»,-ասաց Գևորգ Պետրոսյանը։

Հարցին՝ ինչ է պատրաստվում անել այս կապակցությամբ, պատգամավորը նկատեց՝ սա էլ է ինչ-որ տեխնոլոգիա, որ պատգամավորին հունից հանեն ու շեղեն իր հիմնական աշխատանքից. «Ես ժողովրդի հետ հանդիպումների եմ գնում, ճշտում եմ մարդկանց խնդիրները, ներկայացնում մեր ղեկավարին, փորձում ենք լուծում գտնել։ Վստահ եմ, որ սա Նիկոլ Փաշինյանի գիտությամբ կամ առնվազն իր անմիջական ենթակայի գիտությամբ է արվել, որովհետև էդ անձնավորությունն էդքան դուխ չունի իր նախաձեռնությամբ զանգի ինձ՝ իմանալով ով եմ, ինչ հարգանք ու կշիռ ունեմ իմ բնակավայրում։ Հիմա ավելի շատ եմ գրառումներ անելու, որ ինքը համոզվի՝ մոլորյալ է, ինքնախաբեության հետ գրկախառնված մարդ է։ Իրեն խաբել են, որ ինքն էն դեմքն է, որ կարա զանգի ու ինչ-որ բան պարտադրի»,-ասաց Գևորգ Պետրոսյանը՝ ընդգծելով, որ առանց զգուշացնելու ձայնագրելու իրավունք չուներ։ Եթե ձայնագրում են որևէ մեկին և մտադիր են այդ ձայնագրությունն օգտագործել որպես ապացույց, ապա պարտավոր են տեղյակ պահել, որ ձայնագրում են։

Աղբյուր` Փաստինֆո