Փաստ ինֆո

Ամուլսարում մի քանի օր լարված իրավիճակ էր․ «Լիդիան Արմենիան» որոշել էր փոխել իր պահնորդական կազմակերպությունը։ Նոր ծառայության աշխատակիցներն էլ տարածք էին մտել ամբողջ կազմով, զենքերով և դիմակավորված։ Տարածք մուտք գործելիս էլ ծառայության աշխատակիցները մեքենայի տակ էին գցել տարածքում գտնվող շան ձագերից երեքին։

«Փաստինֆո»-ն զրուցել է Ամուլսարի պահպանության համար պայքարող Ջերմուկի բնակիչ, բնապահպան Շիրակ Բունիաթյանի հետ և պարզել որոշ մանրամասներ։ Հարցին, թե պահնորդական կազմի փոփոխությունը որևէ միտում ունե՞ր թե ոչ, բնապահպանը պատասխանեց․

«Չեմ ուզում պահնորդական կազմի աշխատանքների մեջ միտում տեսնել, որովհետև սա սովորական գործընթաց է։ Լիդիանի իրավունքն է ինչ-որ պահնորդական կազմակերպության հետ պայմանագիրը խզել և նորը կնքել մեկ այլ պահնորդական կազմակերպության հետ։ Պայմանագիրը վերաբերում է գույքի պահպանմանը։ Նրանք թիկնապահներ կամ թիկնազոր չեն և առավելություն չունեն։ Կատարելու են նույն գործառույթը՝ ինչը նախորդ կազմակերպությունը»։

Ըստ Բունիաթյանի՝ կազմակերպությունն այլ գործառույթ չունի, ցանկացած այլ գործողություն ինքնիրավչություն է։ Ծառայության աշխատակիցները պետք է միայն հսկեն Ամուլսարի գույքը։ Կարծում է՝ գույքը պահպանելու հետ կապված կազմակերպությունը զենք ունենալու իրավունք ուներ, սակայն խնդիրը դրանում չէր։

«Նրանք զենքը կրում էին մի վայրում, որտեղ դրա իրավունքը չունեին։ Այսինքն` համայնքային տարածքում՝ իրենց համար նախատեսված տարածքից դուրս և անմիջապես Ջերմուկ տանող մայրուղու վրա։ Նրանք տարածքում զենք կրելու կամ մահակով շրջելու իրավունք չունեին, որովհետև նրանք ոստիկանության կամ այլ պետական մարմնի ներկայացուցիչ չեն, նրանք ընդամենը մասնավոր պահնորդական կազմակերպության աշխատակիցներ են»,- ասաց Շիրակ Բունիաթյանը։

Հարցին, թե իրենք մտավախություն չունե՞ն, որ արտակարգ դրության պայմաններն օգտագործելով «Լիդիան Արմենիան» կփորձի վերսկսել աշխատանքները, բնապահպանը պատասխանեց, որ իրենք Ամուլսարի պահպանությունը հավասարազոր են համարում Արցախի հարցին։

«Կարծում եմ, որ մեր կառավարությունը այդ հարցին մակերեսորեն չի նայում։ Մենք երկու տարուց ավելի է ասում ենք, որ Ամուլսարի հարցը մեզ համար նույն հարթությունում է, ինչը որ Արցախի հարցը։ Տեսեք՝ արտակարգ դրություն է․ շատ դեպքերում մարդիկ կարող են կորոնավիրուսի կոնտակտավոր կամ մեկուսացված լինել, բայց, կարծում եմ, ցանկացած խելամիտ, հայրենասեր մարդ, որ իմանա օրինակ Արցախում իր կարիքը կա՝ պատրաստակամ կլինի։ Նույն վիճակն էլ արմատավորված է Ամուլսարի հարցում։ Եթե կլինեն արկածախնդիրներ, որ կմտածեն, իբրև կորոնավիրուսի համավարակի հետ կապված մարդիկ կվախենան դուրս գալ, կարծում եմ, դա կլինի իրենց ամենամեծ քաղաքական սխալը»։

Ըստ Բունիաթյանի իրենք ցանկացած սցենարի պատրաստ են, որովհետև Ամուլսարի հարցում կյանք են դրել։

«Ուզում ենք հուսալ, որ մեր կողմից ընտրված կառավարությունը խելամիտ կգտնվի և սցենարի նման զարգացում թույլ չի տա։ Ամուլսարի հարցը ժողովուրդը որոշել է և դա քննարկման ենթակա չէ։ Բազմիցս ապացուցել ենք, որ ցանկացած գործողություն արժանանալու է ժողովրդի ցասումին։ Կառավարությունը պետք է ընդունի, համակերպվի և շարժվի առաջ»։

«Փորձում եմ հավատալ Նիկոլ Փաշինյանի խոսքերին, փորձում եմ հավատալ, որ նա չունի շահագրգռվածություն, որ Ամուլսարում հանք շահագործվի։ Իմ կարծիքով՝ կառավարությունը շատ է երկմտում՝ ունենալով նման լեգիտիմություն, չգիտեմ հիմա ինչ աստիճանի է մնացել առաջվա համեմատ, բայց եկեք համաձայնեք, որ կառավարությունը ունի բարձր լեգիտիմություն, և հանրության մեծ մասը վստահաբար կարող եմ ասել դեմ է Ամուլսարում հանքարդյունաբերությանը։ Հայ ժողովրդի մեջ այլ կերպ է արմատավորվել Ամուլսարի հարցը։ Այս դեպքում կառավարությունը շատ հանգիստ կարող է ուղղակի արագ լեգիտիմացնել ժողովրդի որոշումը» ։

Շիրակ Բունիաթյանը «Փաստինֆո»-ին տեղեկացրեց, որ այս պահին Ամուլսարում ծառայությունն իրականացվում է նույն կերպ, ինչպես նախկին կազմակերպության ժամանակ։ Ասում է,- «Կարելի է ասել, որ միայն անունն է փոխվել։ Մինչև այս պահը ժողովրդի հետ ձեռք բերված պայմանավորվածությունը պահում են և մեն ինչ հանգիստ է»։

Աղբյուր` Փաստինֆո