Փաստ ինֆո

ԱԺ նախկին պատգամավոր Մանվել Գրիգորյանի եղբորորդու՝ Հրանտ Գրիգորյանի վերաբերյալ քրեական գործը չէր կարող վերաբացվել, քանի որ գործը, որը քննվել է 1994թ.-ին, սահմանված կարգով արխիվացվել և ոչնչացվել է: Այս մասին «Փաստինֆո»-ի հետ զրույցում ասաց Հրանտ Գրիգորյանի փաստաբան Հովսեփ Սարգսյանը:

Հիշեցնենք, որ 1994թ Աշտարակի նախկին ժողդատարանի կողմից կայացված դատավճռով Հրանտ Գրիգորյանը մեղավոր էր ճանաչվել 1961 թ ընդունված ՀՀ քրեական օրենսգրքի 259.1-րդ հոդվածի «Բ» կետով՝ զենքի հետ վարվելու կանոնների խախտմամբ Մհեր Պողոսյանին մահ պատճառելու համար և դատապարտվել է ազատազրկման՝ 1 տարի ժամկետով։ Դատավճիռը չի բողոքարկվել ու այն մտել է օրինական ուժի մեջ:

24 տարի անց` 2018թ հուլիսի 12-ին, Էդուարդ Պողոսյանը՝ Մհեր Պողոսյանի որդին, հանցագործության մասին հաղորդում է ներկայացրել` պնդելով, թե իր հայրն իրականում սպանության զոհ է դարձել. 1994 թ ապրիլի 16-ին Արմավիրի մարզի Ակնալիճ գյուղի տարածքում գործող ռեստորանային համալիրում վիճաբանության ընթացքում սպանել է Հրանտ Գրիգորյանը, սակայն դեպքի հանգամանքները խեղաթյուրելու արդյունքում Գրիգորյանը դատապարտվել է 1 տարվա ազատազրկման։

Հանցագործության մասին հաղորդման հիման վրա ՀՀ ոստիկանության Վաղարշապատի բաժնում հարուցվել է քրեական գործ՝ պաշտոնատար անձի կողմից անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, կեղծում մտցնելու դեպքի առթիվ, որի նախաքննությունը կատարվել է ՀՀ ՔԿ զինվորական քննչական գլխավոր վարչությունում։ ՀՀ զինվորական կենտրոնական դատախազության զինվորական ծառայության դեմ ուղղված հատկապես կարևոր գործերով քննության նկատմամբ հսկողության բաժնի դատախազ Վ. Հարությունյանի որոշմամբ հարուցվել է վարույթ՝ նոր իհայտ եկած հանգամանքների հիման վրա։

2019թ փետրվարի 20-ին ՀՀ զինվորական դատախազ, ՀՀ գլխավոր դատախազի տեղակալ Վ. Հարությունյանի որոշմամբ վերաքննիչ բողոք է ներկայացվել՝ դատավճիռը նոր ի հայտ եկած հանգամանքների հիման վրա վերանայելու համար։ Վերաքննիչ քրեական դատարանը որոշել է քրեական գործն ուղարկել Առաջին ատյանի դատարան` նոր դատաքննության:

Վերաքննիչ դատարանի որոշման դեմ մայիս ամսին ներկայացվել է վճռաբեկ բողոք` պնդելով, որ չկա որեւէ նոր երեւան եկած հանգամանք ու նոր դատաքննություն սկսվելու դեպքում այն պարզապես կկարճվի:

«Փաստինֆո»-ի հետ զրույցում պաշտպան Հովհաննես Սարգսյանը Վերաքննիչ դատարանի որոշումը որակեց որպես պոպուլիստական` նշելով, որ դատական ակտում իրավական որևէ փաստարկում գոյություն չունի, չկա որևէ պատճառաբանված միտք, որ առկա է նոր ի հայտ եկած հանգամանքը: Սարգսյանը գտնում է, որ խնդիրը պետք է այլ վայրում փնտրել, որոշումը հիմնված է բացառապես էմոցիաների վրա, այնքանով, ինչքանով ցանկություն է եղել ցույց տալու, որ 25 տարվա վաղեմության դատական ակտ են վերանայել։

«Եթե իմ վճռաբեկ բողոքը չընդունվի վարույթ և գործը գնա առաջին ատյանի դատարան, ինչպես Վերաքննիչ դատարանն է կանխորոշել, կառաջանա քրեադատավարական, իրավական քաոս, որովհետև դատարանի սեղանին չի լինի որևէ փաստական տվյալ և ապացույց , չի լինի քրեադատավարական օրենսգրքով նախատեսված ընթացակարգով ձեռք բերված տվյալներ, որի արդյունքում պաշտպանական կողմը ստիպված կլինի ասել՝ վերցրեք և կարճեք գործի վարույթը, դադարեցրեք քրեական հետապնդումը, ինչն առաջացնելու է իրավական քաոս և առաջ է բերելու սոցիալական անարդարության, որովհետև կիմանանք, որ եղել է ինչ որ դեպք, կիմանանք, որ այդ դեպքի առթիվ վարույթ է հարուցվել, դատական ակտ է կայացվել, հետո այդ գործը վերացվել է, դատական ակտը վերացվել է, բայց հիմքը չկա և ստիպված են լինելու գործի վարույթը կարճել։ Որևէ իրավաբան չի կարչող պնդել, որ առանց քրեական գործի, առանց քրեական գործի վարույթի կարող է ինքը քրեական գործ քննել, մարդու դատապարտել»,- նշեց Սարգսյանը՝ նշելով, որ և դատախազությունն իր բողոքով, և Վերաքննիչ դատարանի որոշումն առաջացրել են իրավական անորոշություն։

«Ջուր պղտորելով մարդ են դատում կամ ուզում են դատել։ Սա՞ է օրենքի և իրավունքի գերակայությունը, եթե սա է, կներեք, ես ճիշտ տեղում չեմ հայտնվել »,- ասաց փաստաբանը։

Սարգսյանը նշեց, որ մահացած Մհեր Պողոսյանի որդու ներկայացրած դիմումի հետ սխալ են վարվել, որովհետև այն ոչ թե պետք է ուղարկվեր ոստիկանություն, այլ՝ դատախազություն, որտեղ պետք է որոշում կայացվեր՝ արդյո՞ք նոր ի հայտ եկած հանգամանքի վարույթ կարող է հարուցվել, թե ոչ։

Անդրադառնալով Գրիգորյանի և տուժողի ընտանիքի անդամների հարաբերություններին՝ փաստաբանը նշեց, որ թշնամական հարաբերություններ չի եղել, ավելին՝ տարիներ շարունակ ֆինանսական օգնություն է ցուցաբերել։

«14 տարի ի վեր անձն ինչ որ նյութական օգնություն է ցուցաբերել։ Կարծում եմ՝ սա և բարոյական է, և նորմալ է և շահարկումների կարիք չկա»,- ասաց նա։
Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո