Փաստ ինֆո

«Հայաստանում Սահմանադրությունն ունի պաշտպանության կարիք՝ հատկապես հաշվի առնելով արդի զարգացումները»,- Սահմանադրության օրվան նվիրված խորհրդաժողովի ժամանակ հայտարարել է սահմանադրագետ Գրիգոր Մուրադյանը:

Ինչպես արդեն տեղեկացրել ենք` «Իրավական ուղի» ՀԿ-ն Գոշավանքում կազմակերպել է «ՀՀ Սահմանադրություն․ կարմիր և կանաչ գծեր» խորագրով խորհրդաժողովում` նվիրված է ՀՀ Սահմանադրության օրվան։

Գ.Մուրադյանն անդրադառնալով Սահմանադրության շուրջ արդի զարգացումներին՝ մասնավորապես Սահմանդրության անցումային դրույթներում նախատեսված 213 հոդվածի փոփոխությանը` այն որակել է որպես փորձ` Սահմանադրական դատարանը դարձնել կցորդ ու հպատակ գործադիր ու օրենսդիր մարմիններին։

Արդի զարգացումներից մեկն էլ, ըստ Մուրադյանի, Սահմանադրական բարեփոխումների մեկնարկած գործընթացն է, որի արդյունքում պետք է լինի կամ նոր Սահմանդրություն, կամ որոշակի փոփոխությունների նախագիծ, որը կներկայացվի հանրաքվեի։

«213 հոդվածի փոփոխությամբ ստեղծվել է մի իրավիճակ, երբ դրա կայունությունը պետք է երաշխավորված լինի, փոխվել է իբր այն հիմնավորմամբ, որ ՍԴ կազմը պետք է համապատասխանեցնել Սահմանդրության 7-րդ գլխում ամրագրված սահմանդրական արդարադատության մոդելին։ Կարծում եմ, բոլորի համար ակնհայտ է, որ դա եղել է պատրվակ, եւ խաթարում ենք 2018-ին ուժի մեջ մտած Սահմանադրության կայունությունը, դա չի կարող չունենալ հետևանքներ Սահմանադրության կայունության տեսանկյունից»,-ասաց նա։

Սահմանադրագետ բանախոսը նկատեց՝ փոփոխվել է մի դրույթ, որը որևէ դեպքում ենթակա չէր փոփոխման։

Սահմանադրագետի խոսքով, ստեղծվում է նաև նախադեպ, երբ ցանկացած իշխանություն կարող է այս կամ ավելի դյուրին կերպով փոփոխել ՍԴ կազմը։

«Մենք նաև մեծ վտանգ ենք առաջացնում պետական անվտանգության համար, երբ ձևավորվելիք ՍԴ-ն չի ունենալու լեգիտիմություն, նրա ընդունած բոլոր որոշումները կլինեն ոչ լեգիտիմ կամ առանվազն կասկածելի»,-ընդգծեց բանախոսը՝ ավելացնելով, որ լեգիտիմության բացը թույլ չի տա ՍԴ-ին համագործակցել նաև այլ երկրների ՍԴ-ների հետ, դա էլ իր հերթին կբերի այլ խնդիրներ։

Մանրամասները` տեսանյութում:

Աղբյուր` Փաստինֆո