Փաստ ինֆո

Ունենք համաճարակաբանության աքսիոմա, որ եթե վիրուսն ուսումնասիրված չէ, անհայտ է, ապա իրեն դիտարկում ենք որպես առավելագույն վտանգավոր, մինչև հակառակն ապացուցված չէ։ Այս մասին այսօր մամուլի ասուլիսի ժամանակ ասաց համաճարակաբան Էդվարդ Հովհաննիսյանը։

«Բայց արդյոք իրականում այդքան էլ ուսումնասիրված չէր։ Եթե վերցնենք ԱՀԿ-ի փետրվարի հաղորդագրությունները, ապա արդեն բավական տեղեկատվություն կար, որ վիրուսն ունի բավականին մեծ վտանգավորություն, ունի պանդեմիայի վերածվելու բնութագրեր, ունի բարձր մահաբերություն։ Նույնիսկ հստակ տեղեկություն կար, որ չի կարելի համեմատել գրիպի հետ, որովհետև կորոնավիրուսի դեպքում մահաբերությունն ավելի բարձր է, գրիպի վիրուսն ունի պատվաստանյութ, գրիպի վիրուսը շատ տարածված է և իմունային համակարգը ծանոթ է։ Այսինքն արդեն փետրվարի կեսերին ԱՀԿ-ն տեսել էր այդ տենդենցը, որ կան որոշ գործիչներ, որոնք փորձում են համեմատել, նվազեցնել վիրուսի վտանգավորությունը։ Փաստորեն կարող ենք պնդել, որ եթե կա անծանոթ վիրուս, ապա պետք է մաքսիմալ միջոցառումներ կատարել»,-ասաց Էդվարդ Հովհաննիսյանը։

Վերջինս նկատեց՝ կարանտինը լիարժեք չի իրականացվել, որովհետև պետք էր մտցնել խորը կարանտին, քանի որ տեղյակ չենք՝ ինչի հետ գործ ունենք։ Բացի այդ ԱՀԿ-ի կողմից արվել է հայտարարություն, որ բնակչության հետ պետք է աշխատանք տարվի։ Այսինքն պետք է բնակչության հետ հաղորդակցման հստակ ռազմավարություն մշակվեր. «Բնակչությանը պետք է տրվի լիարժեք ինֆորմացիա, որպեսզի բնակչության բոլոր շերտերը պաշտպանված լինեն վիրուսից և խուճապ չառաջանա։ Եթե մենք ասենք՝ խուճապի մի մատնվեք, դա չի աշխատի։ Խուճապ չի լինում այն ժամանակ, երբ բնակչությունը ստանում է լիարժեք, մատչելի և կիրառելի ինֆորմացիա։ Կարող ենք հիշել

Առողջապահության նախարարի կողմից փետրվարին տրված ինֆորմացիան։ Արդյո՞ք դա եղել է լիարժեք, բնակչությանը պաշտպանող և վարքագիծ մշակող։ Տրամաբանական է՝ ոչ։ Խուճապը հենց այն ժամանակ առաջացավ, երբ մարդիկ տեսան, թե ամբողջ աշխարհում ինչ է կատարվում, բայց չէին ստանում լիարժեք գիտելիքներ և տեղեկատվություն, թե ինչպես կարող են իրենց պաշտպանել»,-ասաց համաճարակաբանը։

Աղբյուր` Փաստինֆո