Փաստ ինֆո

Գույքահարկի մասին ՀՀ օրենքը դեռ չմարսած ու հետկանչած,  ՀՀ իշխանությունը համատարած հարկահանության հաջորդ ծրագիրն էլ ունի, որ  մտածում է կյանքի կոչել:

Եթե  արտասահմանյան տարբեր երկրներում սեփական քաղաքացիներին համատարած հայտարարագելու պրակտիկան բազմաթիվ տարիների փորձառություն ունի, ապա Հայաստանում ֆիզիկական անձանց եկամուտների համատարած հայտարարագրման մասին առավել շոշափելի այսօր է կառավարությունը քննարկում: Ընդ որում, այդ քննարկումներին մինչ այժմ հանրությունը եթե անգամ  տեղյակ է, ապա հիմնականում՝ ոչ պաշտոնական, մեկից մյուսը փոխանցվելու ճանապարհոսվ: Իսկ ինչպես բոլոր նման դեպքերում՝ շեշտադրումներն ու մոտիվները բացասական են լինում: Ասել է, թե՝ այս նախագիծը դեռ անցնելու ճանապարհ ունի: Ընդ որում, և մասնագիտական , և՛ հանրային քննարկումներով:

Նախ՝ պարզից էլ պարզ է, որ սա նույնպես բնակչության, ժողովրդի հաշվին ՀՀ պետբյուջեն լցնելու հերթական քայլն է, որին, անշուշտ գումարվում է ստվերային եկամուտները գտնել-հայտնաբերելու մոտիվը:

Եվ գիտեք, ո՞րն է ամենաուշագրավը, այս թեմային անդրադառնալիս, մարդիկ հիմնականում շեշտում են, որ կառավարությունն ուզում է նաև դրսից Հայաստան եկող տրանսֆերտները հարկել, ինչն ուղղակի մարդու իրավունքների դեմ քայլ կլինի: Դատեք ինքներդ, ի՞նչ գործ ունի պետությունն այլ պետությունում գումար վաստակած որդու կամ՝ ընտանիքի այլ անդամի՝ իր ծնողին ուղարկած մի քանի կոպեկի հետ, որ գնա գլխին կանգնի: 

Իսկական Թումանյանի ,,Չարի վերջը,, ասես լինի, երբ աղվես-աղան անպայման ուզում է հատ-հատ իմանալ, թե կկուն քանի փոքրիկ ձագ ունի:

Սա, թերևս,  ամենացցուն անարդարությունը  կլինի այս համատեքստում, թեպետ ազատ-ստեղծագործողները նույնպես համատարած հայտարարագրման դեպքում ըմբոստացողներից են լինելու:

Սակայն, թավշյա հեղափոխությանը հաջորդող թավշյա իրականության ողջ զավեշտն այն է, որ իշխանություններն  արտերկրից հարյուր-հազարավոր հայերի ներգաղթից, ներդրումային բումից ու դրանով պայմանավորված բազմաթիվ աշխատատեղերից հույսները կտրած՝ նորից եկան կանգնեցին ՀՀ քաղաքացու գլխին:

 Մանավանդ,  տարբեր տրամաչափի կոռուպցիոներներին կուլակաթափ անելու հաշվին էլ կարծես բյուջեն դեռ չի լցվում, ամեն դեպքում, նման շոշափելի դրսևորում բյուջեի մասով չի եղել:

Պետությունը ցանկանում է իմանալ իր քաղաքացին ի՞նչ եկամուտ ունի և որտեղի՞ց է այն գոյանում: Ի վերջո, ի՞նչ է ծախսում: Իսկ այս ամենի համար նա հայտարարագիր պիտի լրացնի և մեկ-մեկ տեղեկացնի և՛ եկամուտների, և՛ ստացած նվերների մասին:

Այս ցանկում պիտի հայտնվեն բոլորը՝ ռեպետիտորներից մինչև՝ վարձակալությամբ բնակարաններ ու տարածքներ տվողները, դայակներն ու տնայնագործները…

Հուսով ենք, ընդգրկման առումով բոլոր քաղաքացիներին վերաբերվող այսօրինակ օրենքը մինչ ԱԺ հասնելը ահագին ճանապարհ ունի անցնելու:

Հատկապես, դրսից եկող օգնությունների հարկումը պիտի բացառվի, քանի որ այն արդեն իսկ տվյալ երկրում հարկվել է, բացի այդ էլ՝ պետությունն այս դեպքում դեր չունենալով նույնիսկ շահում է՝ իր քաղաքացին ստացած տրանսֆերտները ծախսում է Հայաստանում:

Համատարած հայտարարագրման միջոցով բյուջեն արագ լցնելու իշխանության ցանկությունը, բնականաբար, դեռ որոշ ժամանակ պիտի սպասի, քանզի համավարակի և սոցիալ-տնտեսական ճգնաժամի ժամանակ նման քայլերը ոչ  միայն արդարացված չեն, այլև՝ անընդունելի են:

Հեղինակ՝  Մ. Մինասյան

Աղբյուր` Փաստինֆո