Փաստ ինֆո

Ոստիկաններն այսօր «Արմնյուզ» հեռուստաընկերության դեմ վարչական վարույթ հարուցեցին՝ եթերում դիմակ չկրելու համար։ «Քառյակ մեդիա»-ի գլխավոր տնօրեն Արամ Անտինյանը ֆեյսբուքյան իր էջում գրել էր, որ հանրային վայրերում դիմակի կրումը պարտադիր դարձնելուց հետո Արմնյուզի հաղորդավարները սկսել են դիմակներով եթեր մտնել մինչ այն պահը, երբ Հեռուստառադիոխորհրդի նախագահ Տիգրան Հակոբյանն ասաց, որ եթերում դիմակ կրելը պարտադիր չէ։

«Տիգրան Հակոբյանը հարցազրույց տվեց 168 ժամին ու փաստով ֆիքսեց, որ դիմակ կրելը եթերում պարտադիր չէ։ Մեր հաղորդավարներն այդ պահից սկսեցին եթերում դիմակ չկրել»,-գրել է Արամ Անտինյանը։ «Փաստինֆո»-ն փորձեց կապ հաստատել ՀՌԱՀ նախագահ Տիգրան Հակոբյանի հետ՝ հասկանալու ի վերջո պետք է եթերում դիմակ դնել, թե ոչ և եթե այս դեպքում հեռուստաընկերությունը պարետի որոշումը չի պահել, ապա ինչու ՀՌԱՀ-ը հայտարարությամբ հանդես չի եկել։ Տիգրան Հակոբյանը, սակայն, անգամ չփորձեց լսել մեր հարցերը, միայն ասաց. «Ուրախ եմ, զբաղված եմ» և հեռախոսն անջատեց, չպատասխանելով դրան հաջորդած մեր զանգերին ու հաղորդագրությանը։ Այս պահին էլ ոստիկանները «5-րդ ալիք»-ում են կրկին նույն նպատակով։

«Փաստինֆո»-ն փորձեց ուսումնասիրել համավարակի պայմաններում աշխատող միջազգային լրատվամիջոցների փորձը։ Ընդ որում այն երկրները, որոնք առաջատարն են վարակակիրների և մահացածների թվով, եթերում չեն պարտադրում դիմակ կրել։ ԱՄՆ-ում, որտեղ կորոնավիրուսով վարակակիրների թիվն արդեն մոտենում է 3 միլիոնի, իսկ մահացածները՝ 131 486-ն են, հաղորդավարները եթեր են մտնում առանց դիմակի։ Եթերում առանց դիմակի են նաև ռուսական հեռուստաընկերությունների, այդ թվում «Россия», «Россия24» -ի հաղորդավարները։ Իրավիճակը նույնն է նաև Հնդկաստանում, Իտալիայում, Հարավային Կորեայում, որտեղ նույնպես վարակակիրների թվերը բավական բարձր են։ Թե՛ լուրերի թողարկման, թե՛ հաղորդումների ժամանակ որևէ մեկը դիմակ չի կրում։

Այսպիսով միայն Հայաստանում են հաղորդավարները եթեր մտնում դիմակով, այնուհետև հայտարարվում է, որ դիմակը եթերում պարտադիր չէ, եթե պահպանվում է ֆիզիկական հեռավորությունը, սակայն ոստիկանները, միևնույն է, տուգանում են հեռուստաընկերություններին։ Հայտարարությունների և գործողությունների հակասությունները, հստակ պարզաբանում չներկայացնելը լրատվամիջոցի ներկայացուցիչներին շփոթմունքի մեջ է գցել՝ ի վերջո եթերում պե՞տք է դիմակ կրել, թե՞ ոչ։ Ընդ որում նշենք, որ Հանրային հեռուստաընկերությամբ հեռարձակվող «Երաժշտական փոստարկղ» հաղորդման հունիսի 28-ի թողարկման ժամանակ եթերի սկզբում հաղորդավարուհի Սուսաննա Շահինյանը դիմակը հանեց և հաղորդումը շարունակեց առանց դիմակ. «Այսօր ես այստեղ մենակ եմ, տաղավարն ախտահանված է, և մեր աշխատակազմը գտնվում է դիմացի ապակեպատ պատից այն կողմ, պահպանում ենք սոցիալական անհրաժեշտ հեռավորությունը, և ես այժմ առանց դիմակի կսկսեմ իմ ծրագիրը»,-ասաց Սուսաննա Շահինյանը։

Աղբյուր` Փաստինֆո