Փաստ ինֆո

Վերաքննիչ քրեական դատարանում՝ դատավոր Մխիթար Պապոյանի նախագահությամբ, սկսվել է «Բարգավաճ Հայաստան» կուսակցության ղեկավար Գագիկ Ծառուկյանի խափանման միջոցի վերաբերյալ բողոքների գործով նիստը։ Նշենք, որ Գագիկ Ծառուկյանը վարակվել է կորոնավիրուսով, ուստի՝ այս դատական նիստին մասնակցել չի կարող։ Պաշտպաններից Երեմ Սարգսյանը լրագրողների հետ զրույցում ասաց, որ օրենսդրությունը պարտադիր պահանջ չի սահմանել և դատական նիստը կարող է ընթանալ առանց Գագիկ Ծառուկյանի։

«Մենք եկել ենք հենց այն նպատակով, որպեսզի դատական նիստի հետաձգում տեղի չունենա։ Նույնիսկ այն փաստը, որ Գագիկ Ծառուկյանն այս պահին վարակված է կորոնավիրուսով, չի խանգարել, որպեսզի դատական նիստը շարունակվի և հույս ունեմ, որ այն կշարունակվի։ Սակայն, հաշվի առնելով գործի այն ծավալը, որ առկա է, այդ թվում՝ դատախազության և պաշտպանների կողմից ներկայացված մի քանի  բողոքները, կարծում եմ՝ ժամանակի առումով հնարավոր չի լինի ավարտել։ Մենք շատ մանրամասն վերլուծություններ  ունենք, որ այս ամենը քաղաքական բնույթ է կրում, բացի այդ՝ հիմնավոր կասկածներ ունենք՝  ՀՔԾ-ի քննության  մասով, ԱԺ  ներկայացված միջնորդագրում մեղադրանքի բովանդակության և կալանավորման  միջնորդության մեջ մեղադրանքի բովանդակության էական տարբերության մասով։ Կարծում ենք, որ այս բոլոր փաստարկիները պետք է քննության առարկա դառնա, որովհետև Առաջին ատյանի դատարանը նշել էր, որ դրանք այս փուլում քննության ենթակա չեն, բայց մեր դիրքորոշմամբ՝ դրանք պետք է քննվեն»,- նշել է փաստաբանը։

Ինչպես ավելի վաղ տեղեկացրել ենք՝ Գագիկ Ծառուկյանին մեղադրանք է առաջադրվել ՀՀ քրեական օրենսգրքի 38 -154.2-րդ հոդվածի 2-րդ մասի հատկանիշներով՝ ընտրակաշառք տալու համար ու քննիչը նրան կալանավորելու մասին միջնորդություն է ներկայացրել։ Հունիսի 21-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժել է ԱԱԾ քննիչի միջնորդությունը:

Դատարանի որոշման դեմ վերաքննիչ բողոք ներկայացրել է թե դատախազությունը, թե պաշտպանական կողմը։ Դատախազությունը պահանջում է բեկանել առաջին ատյանի դատարանի որոշումը և կալանավորել Ծառուկյանին, իսկ պաշտպաններն անդրադարձել են քննչական ենթակայության հարցին՝ նշելով, որ այդ քրեական գործով նախաքննությունը պետք է ընթանա բացառապես ՀՔԾ-ում, ինչպես նաև՝ դատարանից խնդրել են հաստատված համարել նաև հիմնավոր կասկածի բացակայությունը։ Բողոքի քննությունը վերաքննիչ քրեական դատարանը նշանակել է հուլիսի 2-ին, մինչդեռ Գագիկ Ծառուկյանի մոտ հայտնաբերվել կորոնավիրուս։

Հիշեցնենք, որ Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-ին քննադատեց իշխանությունների հակամաճարակային գործողությունները նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում բարձրացնելով իշխանությունների 100 տոկոսի փոփոխության հարց:Հայտարարությունից հետո մամուլում շրջանառության մեջ դրվեց 1979թ Գագիկ Ծառուկյանին առնչվող խմբակային բռնաբարության գործի մասին նյութերը։

Հունիսի 14-ին Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել: Նույն օրը նա հրավիրվեց հարցաքննության՝ ՊԵԿ նախկին նախագահ Գագիկ Խաչատրյանի գործով։Հունիսի 15-ին ՀՀ գլխավոր դատախազ Արթուր Դավթյանը միջնորդություն էր ներկայացրել ԱԺ-ին՝ Գագիկ Ծառուկյանին պատգամավորական անձեռնմխելիությունից զրկելու և նրան ազատությունից զրկելու մասին։ Հունիսի 16-ին ԱԺ-ն կողմ է քվեարկեց միջնորդությանը՝ զրկելով Գագիկ Ծառուկյանին անձեռնմխելիությունից և թույլատրելով նրան ազատազրկել եւ նույն օրը Գագիկ Ծառուկյանն ԱԱԾ-ում մեղադրանք է առաջադրվել ընտրակաշառքի գործով։

Հեղինակ՝ Իզաբել Սահակյան

Աղբյուր` Փաստինֆո