Փաստ ինֆո

Երբեմն լինում են դեպքեր, երբ պատգամավորն ընդհանրապես չի մասնակցում նախագծի քննարկմանը, բայց «կտակ» է թողնում, որ լիագումար նիստում ինքը կողմ է։ Սա քաղաքական ուղղորդում է, որը բնորոշ չէ իրավական պետության գաղափարին։ Այս մասին «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով խորհրդարանական մեծամասնության նախաձեռնությանը, որով առաջարկվում է «Ազգային ժողովի կանոնակարգ» օրենքում փոփոխություններ կատարել, որի համաձայն՝ հիվանդ պատգամավորներին հնարավորություն կտրվի գրավոր քվեարկել, ինչպես դա արվում է գործուղման մեջ գտնվող պատգամավորների կողմից։

«Ի՞նչ է նշանակում՝ պատգամավորն ընդհանրապես նախագծին տեղյակ չէ, քննարկմանը չի մասնակցում կամ գուցե և լիագումար նիստին քննարկում է լինում, հնչում են կարծիքներ, որ պատգամավորի դիրքորոշման վրա ազդեցություն է ունենում։ Սա նշանակում է՝ մեխանիկական վերաբերմունք, իներցիոն վերաբերմունք՝ ԱԺ գործունեության նկատմամբ։ Իրենց քայլերում դա ընդունված բան է։ Կարծում եմ՝ այդպես չպետք է լինի»,- ասաց Պետրոսյանը՝ նշելով, որ Սահմանադրության համաձայն պատգամավորը պետք է քվեարկի իր խղճով և համոզմունքներով։

«Ի՞նչ է նշանակում, եթե մարդը որևէ նախագծի քննարկմանը չի մասնակցել և համոզմունք չունի նախագծի բովանդակության վերաբերյալ, բայց գալիս է և հեռավար քվեարկում։ Սա ծաղր է, անլուրջ վերաբերմունք՝ Օրենսդիրի գործունեության վերաբերյալ »,- ընդգծեց Պետրոսյանը։
Նրա խոսքով՝ սա իսկապես նման է կտակի և հայտնեց, որ պատրաստվում է նախաձեռնությամբ հանդես գալ, որ հեռահար քվեարկությունը հանվի։

«Իհարկե հաշվի առնելով կորոնավիրուսի հանգամանքը, եթե իսկապես նման վարակ կա երկրում և ոչ թե սա ինչ- որ շինծու բան է, կարելի է մտածել հեռահար քվեարկության մասին, բայց պատգամավորը պետք է տեղյակ լինել, թե ինչի մասին է խոսքը »,- ասաց Պետրոսյանը։

Հեղինակ՝ Իզաբել Սահակյան

Աղբյուր` Փաստինֆո