Փաստ ինֆո

Դիմակների շուկայում առաջացել է դիմակների պրոֆիցիտ,- կառավարության այսօրվա նիստում հայտարարել է Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Գեղամ Գեւորգյանը։ Ըստ նրա՝ մոտ երկու ամիս առաջ ներկրված դիմակները որոշ չափով թանկ են ներկրվել, իսկ տեղական արտադրությանը արժե 60 դրամ ու հիմա դիմակների պրոֆիցիտ է առաջացել։ «Ավելի շատ դիմակ ունենք, քան վաճառվում է։ Մի խմբաքանակ արտահանվել է 60 դրամով, եւս մեկ խմբաքանակի համար հայտարկվել է»,- ասաց Գ.Գեւորգյանը՝ նշելով, որ երկու խնդրի առաջ են այսօր կանգնել։ Այն է՝ եթե արգելվի դիմակների արտահանումը, ապա տնտեսվարողը ստիպված է լինելու վնասով աշխատել, բայց ավելի էժան վաճառել։ Իսկ եթե թույլատրվի արտահանումը, ապա գինը կմնա կայուն՝ 60 դրամ տեղականը և մի փոքր ավելի թանկ դրսից ներկրվածը:

Ինչին ի պատասխան վարչապետը հայտարարեց, որ նախկինում դիմակների գները բավական բարձր էին, իսկ կրումը դարձել էր անհրաժեշտ ու պարտադիր, ուստի առաջարկեցին, որ նրանք, ովքեր հնարավորություն ունեն՝ գնեն գործարանային արտադրության դիմակներ, իսկ ովքեր՝ ոչ, ապա տնային պայմաններում կարված։

«Հիմա ունենք գնանկում եւ ունենք պրոֆիցիտ ու կարող ենք անցում կատարել երրորդ փուլին եւ մեր բոլոր քաղաքացիներին կոչ անել կրել բացառապես գործարանային արտադրության դիմակ։ Ըստ էության այսօր նայում ենք շուկայում դիմակների սպառման ծավալները՝ ակնհայտ է, որ մեր քաղաքացիների մեծամասնությունը գործարանային արտադրության դիմակ չի կրում»,- հայտարարեց Ն.Փաշինյանը՝ նշելով, որ գործարանային արտադրության դիմակներն ավելի օգտակար են։

Աղբյուր` Փաստինֆո