Փաստ ինֆո

Եթե ՀՀ նախագահը հայտարարել է, որ չի ստորագրելու օրինագիծը, ապա այս պարագայում ծագում է նրա պարտականությունը՝ անպայմանորեն դիմելու ՍԴ։ Այս մասին «Փաստինֆո»-ի եթերում ասել է սահմանադրագետ Վարդան Այվազյանը՝ անդրադառնալով «Սահմանադրական դատարանի մասին» սահմանադրական օրենքում փոփոխություններ կատարելու մասին նախագիծը չստորագրելու վերաբերյալ ՀՀ նախագահ Արմեն Սարգսյանի հայտարարությանը։

«Իշխանությունների բաժանման համակագրում գոյություն ունեն զսպումների և հակակշիռների մեխանիզմներ և ԱԺ օրինաստեղծ գործունեության բնագավառում ՀՀ նախագահն օժտված է զսպող գործառույթով։ Եթե նա գտնում է, որ օրենքի նախագիծն աղերսներ ունի Սահմանադրության հետ, ապա նա չի ստորագրում և դիմում է ՍԴ։ Տվյալ պարագայում մենք ունենք հակամարտություն ՀՀ նախագահի և ԱԺ-ի միջև և Սահմանադրությամբ ՍԴ-ն հանդես է գալիս որպես այն բարձրագույն ատյանը, որը պետք է որոշի այդ հակամարտության ելքը»,- նշեց Այվազյանը։

Սահմանադրագետը պարզաբանեց, որ եթե ՀՀ նախագահի դիմումից հետո ՍԴ-ն կայացնում է որոշում, որ նախագիծը համապատասխանում է Սահմանադրությանը, ապա 5-օրյա ժամկետում ՀՀ նախագահը ստորագրում և հրապարակում է, իսկ եթե ՀՀ նախագահը համաձայն չէ ՍԴ որոշման հետ և չի ստորագրում օրենքի նախագիծը, ապա տվյալ դեպքում ստորագրում և հրապարակում է ԱԺ նախագահը։

Հարցին, թե արդյո՞ք 21 օր չստորագրելու դեպքում այդ իրավունքն ավտոմատ կերպով փոխանցի ԱԺ նախագահին, Այվազյանը պատասխանեց, որ նախագահը կարող է այս պահին հայտարարել, որ չի ստորագրելու և 21-րդ օրն իր աշխատակազմի իրավաբաններն ասեն, որ կարելի է նաև ստորագրել և վերջինս կարող է ստորագրել և հրապարակել, բայց չստորագրելու և ՍԴ չդիմելու դեպքում դա կարելի է դիտարկել որպես ՀՀ նախագահի կողմից Սահմանադրության կոպիտ խախտում։

Մանրամասները՝ տեսանյութում

Աղբյուր` Փաստինֆո