Փաստ ինֆո

Գործարար Բիլ Գեյթսը նշել է COVID-19-ի դեմ պայքարի գլխավոր միջոցները: Կորոնավիրուսին դիմակայելու մեթոդների մասին Microsoft-ի հիմնադիրը հայտարարել Է Fast Company պարբերականին տված հարցազրույցում:

Միլիարդատերն ու բարերարը նշել է, որ համաճարակի դեմ արդյունավետ պայքարի համար իր բարեգործական հիմնադրամը դավանում է չորս մոտեցում՝ պատվաստում, ախտորոշիչ գործիքների ստեղծում, բուժման նոր մեթոդների մշակում եւ բնակչության՝ COVID-19 հանդեպ խոցելի խմբերի համար պաշտպանության լուծումների որոնում: Գեյթսի խոսքով՝ ինքը հույս ունի, որ աշխատող պատվաստանյութը կստեղծվի մինչեւ 2021 թվականը: «Իմ երազանքն է՝ ստանալ պատվաստանյութի 14 մլրդ չափաբաժին եւ պարզապես միանգամից բացել այն բոլորի համար», — հայտարարել է գործարարը:

Գեյթսը նաեւ պատմել է, թե ում է նա մեղավոր համարում այն բանում, որ հասարակությունը բավականաչափ չի դիմադրում կորոնավիրուսին: Նրա խոսքով՝ դրանց թվում են համաշխարհային առաջնորդները, հանրային առողջապահության ոլորտի փորձագետները եւ նրանք, ովքեր ոչ հավաստի տեղեկություններ են տարածում սոցցանցերում մահացու հիվանդության մասին: «Ցավոք, թվային մեդիան, հավանաբար, նպաստել է այն բանի տարածմանը, ինչը ես համարում եմ խելագար գաղափարներ», — ամփոփել է Բիլ Գեյթսը:

Գեյթսը նշել է, որ անհանգստանում է այն պատճառով, որ իր անունը կապում են կորոնավիրուսի կանխամտածված ստեղծման մասին ֆեյքերի հետ: «Ասեկոսեները դավադրության ձեւ ունեն, եւ իմ անունը նույնիսկ հիշատակվում է կոնսպիրոլոգիական որոշ տեսությունների կենտրոնում, եւ դա փոքր ինչ վախեցնում է», — ընդգծել է միլիարդատերն ու նկատել, որ չէր ցանկանա որեւէ մեկին՝ հայտնվել նման իրավիճակում:

Ամերիկացիների մի մասը կարծում է, որ Microsoft — ի հիմնադիրը պատվաստումների ծրագրի միջոցով մարդկանց չիպավորելու ծրագրեր է մշակում. դրանում համոզված են հանրապետական ընտրողների 44 տոկոսը եւ դեմոկրատների 19 տոկոսը: «Ես երբեք չեմ զբաղվել միկրոչիպերի կարգի որևէ բանով։ Դա այնքան դժվար է ժխտել, քանի որ դա շատ հիմար է եւ տարօրինակ մի բան է», — ավելի վաղ պատասխանել է Գեյթսը այդ մեղադրանքներին:

Աղբյուր` Փաստինֆո