Փաստ ինֆո

Հայաստանում մասնագետները գրեթե ամբողջությամբ ներգրավված են առողջապահական համակարգում և բնականաբար այդ միասնական համակարգի մաս են կազմում։ Այս մասին այսօր ճեպազրույցի ժամանակ ասաց ՀՀ վարչապետ Նիկոլ Փաշինյանը՝ անդրադառնալով հարցին, թե համավարակի պայմաններում որքանով է հաշվի առնվում մասնագիտական հանրույթի կարծիքը։

«Մենք մի քանի այդպիսի քննարկումներ, հանդիպումներ նախաձեռնել ենք, մասնավորապես ԱԺ-ի առողջապահության հարցերի հանձնաժողովի աջակցությամբ և պայմանավորվել ենք, որ հանձնաժողովը կհավաքագրի առաջարկները և դրանք կփոխանցի պարետատուն։ Այսօր, ըստ էության, աշխարհում կորոնավիրուսի դեմ պայքարի մեթոդների մասին, ըստ էության, չկա ոչ մի նորություն։ Այսինքն՝ ամբողջ ինֆորմացիան բաց է՝ ինչ է պետք անել չվարակվելու համար»,-ասաց Նիկոլ Փաշինյանը՝ ընդգծելով, որ մեր մասնագետներն ամբողջ ծավալով ներգրավված են կորոնավիրուսի դեմ պայքարին։

Վարչապետը նկատեց՝ մենք այսօր խնդիր չունենք՝ պատկերացում կազմելու համար, թե ինչ է պետք անել արդյունքի հասնելու համար․ Ըստ վարչապետի՝ մենք խնդիրներ ունենք կանոնները պահպանելու տեսակետից. «Մենք ամեն օր ունենում ենք մինի կամ մաքսի ճգնաժամեր։

Երեկ օրինակ այդպիսի ճգնաժամ ունեցանք Varks.am կազմակերպության հետ կապված, երբ պարզվեց, որ լուծարվող կազմակերպությունն իր հաճախորդներին նամակ է ուղարկել և ասել, որ եթե մինչև հունիսի 30-ը իրենց պարտավորությունների ինչ-որ մասը վճարեն, տույժերից ու տուգանքներից կազատեն։ Եվ երեկ ունեցանք զանգվածային հոսք դեպի Varks.am կազմակերպություններ» ,-նշեց վարչապետը։

Աղբյուր` Փաստինֆո