Փաստ ինֆո

Եթե վարչապետով, նախարարներով, մի խոսքով՝ ողջ կառավարությամբ անգամ դուրս գան՝ այգի ու փողոց, անգամ տնետուն  ընկած դիմակներ բաժանեն, միևնույն է, կորոնավիրուսը չի նահանջի Հայաստանից: Եվ գիտեք, թե ինչու՞: Որովհետև շատ տաքուկ է տեղավորվել: Որովհետև իշխանությունը չի ուզում, որ թագավարակ-թագավահանը նահանջի:

Ամեն ինչ տեղի է ունենում մեր աչքի առաջ: Ասենք, կառավարական մակարդակով դիմակ բաժանելուց զատ այսօր ոստիկանությունն է լծվել մեկուսացածների մեկուսացումները վերահսկելուն: Իսկ հսկել ասվածը տուգանք է ենթադրում: Մեկուսացման կամ ինքնամեկուսացման պահանջները խախտելու դեպքում սահմանվում է վարչական պատասխանատվություն` նվազագույն աշխատավարձի 300-500-ապատիկի չափով:Այսինքն, եթե որևէ մեկուսացած դուրս գա փողոց, մուտքի մոտ գտնվող, կամ՝ բակի նստարանին նստած ոստիկանը ըստ օրենքի կարող է մոտենալ նրան  և միանգամից տուգանել: Արդեն իսկ խոսք է գնում թաղային կամ համայնքային  ոստիկանների  մասին: Իսկ մեկուսացածների քարտեզը ցույց է տալիս, թե որտեղ կան վարակակիրներ: Բացի այդ, ոստիկանների ձեռքի տակ անձնագրային տեղեկություններ կան մարդկանց  մասին: Ի վերջո, բոլորի հեռախոսները ցույց են տալիս նաև  տեղորոշումը և հեռախոսազանգերը՝ շփումների շրջանակը:

Հասկանալի է, չէ՞, որ իշխանությունն ամբողջ թափով լծվել է հարկեր ու տուգանքներ հավաքելու գործին: Բայց, այ, թե որքանո՞վ են տներում մեկուսացածներն ու ինքնամեկուսացածները համապատասխան բուժում ստանում, կամ՝ որքանո՞վ են ստանում իրենց հասանելիք գումարները,  ոչ ոք ոչինչ չգիտի: Ավելին, բազմաթիվ մեկուսացածների հետ զրույցները, նրանց բողոքներն ու դժգոհությունները  ցույց են տալիս, որ իրենց որևէ գումար չի տրվել:

Հարց է առաջանում՝ արդյո՞ք առաջին արտակարգ դրությանը հաջորդած մեղմացումները կապված չէր այս փաստի հետ: Տեսեք, եթե մարդը կամ ընտանիքը  տանը մեկուսանան և որևէ տեղից նրանց աջակցություն չտրվի, քանի որ չեն աշխատում, ապա, բնականաբար, մարդը պիտի ձգտի աշխատել՝ հազար ու մի հարց ունի լուծելու: Իսկ այն իշխանությունը, որը ֆինանսապես չի աջակցում  իր քաղաքացուն՝ կորոնավիրուսի դեմ պայքարում, նրան  տանը երկար պահել չի կարող: Եթե չես ապահովում առօրյա կարիքները քաղաքացուդ, չես կարող ասել՝ մնա տանը: Որ մնաց տանը, ո՞վ է նրան պահելու:

Այսօր էլ  ինքնամեկուսացածները, անտեսված են և չափազանց շատ են: Օրենք ընդունեցին, թե՝ տեղորոշումը պիտի պարզեր վարակակրի հետ շփվածների ողջ շրջանակը: Սակայն դա բնավ էլ չի գործում Մարդիկ մատնված են անուշադրության և ինքնագործունեության:

Այս ամենի ֆոնին Արսեն Թորոսյանը ոչինչ չի տեսնում: Կամ՝  վարդագույն ակնոցով է ամեն ինչ տեսնում, քանի որ ասում է՝ «ամեն ինչ լավ է. «շատ-շատ լավ», «շատ լավ տեղում ենք» և այլն, այդ թվում նաև՝  մահերի ցուցանիշներով, «Գերմանիայից ու շատ երկրներից լավ տեղում ենք», «ամբողջ Եվրոպայից լավ տեղում ենք», «Հայաստանում բուժօգնությունը շատ բարձր որակի է», «մեր մոտ մատուցվում է ամենաբարձրորակ բուժօգնությունը նման պացիենտների համար»։

Նա միակն է, որ խոսելով նոր կորոնավիրուսի համաճարակի պատճառով մահերի մասին և համեմատելով դրանք այլ երկրների հետ, կարող է ասել, թե՝  հպարտ եմ, որ ունենք լավ ցուցանիշներ: Իրականում վիճակը չափազանց հեռու է մխիթարական լինելուց, քանի որ  բնակչության մեծությամբ աշխարհում 135-րդ տեղում գտնվող Հայաստանը կորոնավիրուսից մահերի բացարձակ թվով 51-րդ տեղում է /420 մահ/ , ինչը շատ վատ  ցուցանիշ է։

Ընդ որում, առողջապահության ոլորտի պատասխանատուն այս պնդումներն անում է՝  անտեսելով նաև  միջազգային  արձագանքները, մինչդեռ  կորոնավիրուսային մեր ցուցանիշներն արդեն աշխարհի մասշտաբով վատ օրինակի ցուցիչ են և շարունակ Հայաստանն այս առումով հայտնվում է միջազգային լրահոսում:

Հայաստանի առողջապահության ոլորտը ունակ է հրաշքներ գործելու, սակայն համակարգի հնարավորությունները ոչ միայն ի սկզբանե հավուր պատշաճի չօգտագործվեց ՝ այս ոլորտն էլ նախկինների և ներկաների բաժանելու, նաև՝  բնագավառի պատասխանատուի կազմակերպական ապաշնորհության հետևանքով: Փաստն այն է, որ  կորոնավիրուսից մահերի հարաբերական թվով Հայաստանն աշխարհի վատագույն 20 երկրների թվում է հայտնվել՝  զբաղեցնելով 20-րդ տեղը։ Սա խայտառակ վատ ցուցանիշ է։

Արսեն Թորոսյանն գիտակցաբա՞ր, թե՞ անգիտորեն էր կորոնավիրուսը նույնացնում  գրիպի հետ     

Մշտապես ԱՀԿ-ին հղումներ անող Թորոսյանի երկակի ստանդարտները լուրջ խորհրդածելու տեղիք են տալիս: Ինչպե՞ս հասկանալ նրա այն մոտեցումը, թե՝ ,, երբ Հայաստանին վերաբերող թվերը միջազգային աղբյուրներում տարբերվում են հայկականից, առաջնությունը կտանք հայկականին,,: Ստացվում է, որ այս ողջ ընթացքում պարետատունը կոնկրետ մեթոդաբանություն  չու՞նի՝ տվյալները մշակելու համատեքստում, երբ ոնց ձեռնտու է՝ այնպես էլ ներկայացնում են:

Եվ ըստ էության, սկզբից մինչև վերջ հանրության համար մեծ հարցական է մնում, բուն կորոնավիրուսով մահացածների և տարբեր այլ հիվանդությունների առկայության պարագայում կորոնավիրուսի՝ որպես մահն արագացնող գործոնի ազդեցությամբ մահերը, քանի որ կորոնավիրուսով մահացածներին  չեն դիահերձում։

Մենք լրջորեն մտահոգվելու առիթ չունե՞նք, որ ասենք, եթե հունիսի 27-ի դրությամբ իր  2,963,208 բնակչությամբ 135րդ տեղում գտնվող Հայաստանը  գրանցված վարակվածների բացարձակ թվով, այն է՝  23,909 մարդ / 49րդ տեղում է։

Երկու կարծիք լինել չի կարող, որ Արսեն Թորոսյանն այս ցուցանիշների համար ոչ թե պիտի հպարտություն ապրի, այլ պիտի գլուխն ամոթից վեր բարձրացնել չկարողանա:

Ի դեպ,  իրենց բնակիչների թվով շատ տարբեր երկրներ միմյանց հետ համեմատելն էլ աբսուրդի ժանրից է, ուղղակի տպավորություն ստեղծելու համար:

Իսկ այն, որ Հայաստանն իր ապաշնորհ ղեկավարության և առաջին հերթին՝ առողջապահության ոլորտի պատասխանատուի ,,շնորհիվ,, կամ ,,համառ ջանքերով,,  տապալել է կորոնավիրուսի դեմ պայքարը, աներկբա է: Ընդ որում, այս ամենի սկիզբը դրվել էր ավելի վաղ, երբ  տվյալ պաշտոնյան ՄԻԱՎ-ՁԻԱՀ կենտրոնն էր փակում, երբ տուբերկուլյոզային դիսպանսերն էր փակում, այսինքն, առողջապահության բնագծեր, որոնք համաճարակային առումով սերտորեն առնչվում էին նոր կորոնավիրուս կոչվող համաճարակի հետ:

Ի դեպ, այսօր շատերն են այն կարծիքին, որ Հայաստանում համաճարակը քաղաքական գործոն  է եղել  ի սկզբանե, յուրօրինակ վահանի դեր խաղալով իշխանության համար:

Իրականում  Արսեն Թորոսյան պետական պաշտոնյայի, ԱՀԿ հայաստանյան ներկայացուցչի և առողջապահության ոլորտի պատասխանատուի  պատճառով է նախևառաջ, որ Հայաստանը կորոնավիրուսի ցուցանիշներով տխուր պատկեր է ցուցանում, քանզի նա էր, որ լինելով մասնագետ հանրությանը դեռ փետրվարին համոզում էր, թե՝  կորոնավիրուսն առանձնապես գրիպից չի տարբերվում: Այս կերպ, անգիտորեն կամ միտումնավոր  նա մոլորության մեջ գցեց բոլորին:

Օրերս ԵՊԲՀ հոգաբարձուների խորհրդի նախագահ Վահան Արծրունին էլ  օրերս հարցազրույցի ժամանակ տեսակետ էր հայտնել, թե՝ համաճարակի զարգացման,  տարածման և տապալման ընթացքը ցույց է տալիս, որ այս պաշտոնյայի  գործելաոճը և բարոյական կերպարը վտանգավոր է երկրի համար: Ըստ նրա առկա ցուցանիշների ողջ պատասխանատվությունը Թորոսյանի վրա է: Ոչ թե բնակչության վրա, ինչպես փորձ է արվում համաշխարհային մակարդակով

Հեղինակ՝ Աննա Աթանեսյան

Աղբյուր` Փաստինֆո