Փաստ ինֆո

«5-րդ ալիք» ՀԸ սեփականատեր Արմեն Թավադյանի և Վարուժան Մկրտչյանի վերաբերյալ քրեական գործը միացվել է Արմեն Թավադյանի կողմից Վարդգես Գասպարիին շշով ենթադրյալ հարվածելու դեպքի առթիվ հարուցված գործին եւ դատարանում կքննվի մեկ վարույթում։ Ինչպես «Փաստինֆո»-ին հայտնել է պաշտպան Հովհաննես Խուդոյանը՝ նման որոշում է կայացրել Երևանի ընդհանուր իրավասության դատարանը՝ Կարեն Ֆարխոյանի նախագահությամբ։

Նշենք, որ գործերն, ըստ էության, մեկը մյուսի հետ կապ չունեն, քրեական գործերից մեկով կա տուժող, մյուսով՝ ոչ, տարբեր են նաև դատախազները և գործերի միացումը, ըստ Խուդոյանի, ավելի շատ կբարդացնի գործի քննությունը։

Այսօրվա դատական նիստին մասնակցել է նաև «5-րդ ալիք» ՀԸ սեփականատեր Արմեն Թավադյանը։ Նախորդ դատական նիստին նա չէր մասնակցում՝ կորոնավիրուսի համավարակով պայմանավորված։

Ավելի վաղ տեղեկացրել ենք, որ Երևանի ընդհանուր իրավասության դատարանի նախագահ Արթուր Մկրտչյանը, ում ի սկզբանե մակագրված է եղել է Արմեն Թավադյանի և Վարուժան Մկրտչյանի քրեական գործը, փոխանցել է այն դատավոր Ֆարխոյանին, քանի որ վերջինիս վարույթում է գտնվում Արմեն Թավադյանի վերաբերյալ մյուս քրեական գործը։

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին ենթադրաբար կաշառելու համար, որ դատարանում նա սուտ ցուցմունք տա։ Նրա դեմ ցուցմունք է տվել Ռ.Քոչարյանի մեկ այլ ենթադրյալ աջակից՝ Վ.Մկրտչյանը, որը նախ ձերբակալվել էր, ապա՝ ցուցմունք տալուց հետո ազատ արձակվել։ Այդուհանդերձ, այս քրեական գործով Վարուժան Մկրտչյանին եւս մեղադրանք է առաջադրվել։

Ա.Թավադյանը չի ընդունում առաջադրված մեղադրանքը, իսկ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը, հայտարարել է, որ տուժողներին կաշառելու անհրաժեշտություն չկա եւ չի եղել, քանի որ քրեական գործում չկա Ռ.Քոչարյանի դեմ որեւէ ցուցմունք, որը փոխելու կարիք լինի։

Արմեն Թավադյանն ավելի քան երկու ամիս գտնվել է նախնական կալանքի տակ եւ միայն վերաքննիչ քրեական դատարանը՝ Ալեքսանդր Ազարյանի նախագահությամբ, մարտի 11-ին վերացրեց նրա նկատմամբ որպես խափանման միջոց ընտրված կալանավորումը՝ արձանագրելով, որ բացակայում է հիմնավոր կասկածը։

Հիշեցնենք, որ Արմեն Թավադյանը որպես մեղադրյալ է անցնում նաեւ 2019 թվականի մայիսի 13-ին Երևանի ընդհանուր իրավասության դատարանի Ավան նստավայրի շենքի առաջին հարկում տեղի ունեցած միջադեպի գործով ու մեղադրվում է ջրի պլաստիկե շշով Վարդգես Գասպարին հարվածելու մեջ։ Այս քրեական գործը նույնպես գտնվում էր դատավոր Կարեն Ֆարխոյանի վարույթում։

Հեղինակ՝ Իզաբել Սահակյան

Աղբյուր` Փաստինֆո