Փաստ ինֆո

Կարող է լինել այնպես, որ դատարանը չի ցանկանում դատական նիստեր անցկացնել, որովհետև սա այնքան պարզ խնդիր է, որ կարիք չկա, որ որևէ մեկը միջնորդի՝ ապահովել ՀՀ օրենսդրության պահանջները, անձանց կյանքն ու առողջությունը, ձայնագրությունը կամ նվազագույն տեխնիկական պայմանները, որով հնարավոր է դատական նիստ անցկացնել։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հովհաննես Խուդոյանը։

«Դատարանը, դատական դեպարտամենտը պարտավոր են ապահովել բոլոր քրեական գործերով, հատկապես հնչեղություն ունեցող, դատավարության մեծ թվով մասնակիցներ ունեցող գործերով , դատական նիստերում հակահամաճարակային կանոնների պահպանումը, ինչը չի արվել»,- նշեց Խուդոյանը՝ հիշեցնելով, որ կորոնավիրուսի համաճարակի հայտարարումից հետո եղել է երեք դատական նիստ, որոնցից մեկը սկզբնական փուլում, երբ համավարակը դեռ նման տարածում չէր ստացել, մյուս նիստը եղել է մայիսի 8-ին, որտեղ քննարկվել է խափանման միջոցի հարցը և այդ նիստով ևս արձանագրվել է ռիսկը, այնուհետև եղել է նախորդ շաբաթվա դատական նիստը, որի ընթացքում Խուդոյանը հատուկ խնդրել է դատարանին, որպեսզի մինչև հաջորդ դատական նիստին ապահովեն հակահամաճարակային կանոնները։

«Այսօր էլ տեսնում ենք, որ գործընկերս՝ Տիգրան Եգորյանը, հայտարարում է, որ ինքը լրացուցիչ խնդիրներ ունի բարձրաձայնելու՝ կապված տեխնիկական պայմանների ապահովման հետ, դատարանն էլ ասում՝ հաջորդ նիստին կքննարկենք։ Եթե հաջորդ դատական նիստին հայտնի դառնա, որ էլի ինչ -որ խոչընդոտ կա տեխնիկական պայմանների առումով, էլի նույն վիճաբանությունը տեղի է ունենալու »,- ասաց Խուդոյանը։

Պաշտպանն անդրադարձավ նաև ՍԴ ներկայացված դիմումը ետ վերցնելու հանգամանքին՝ նշելով, որ լիազորություն ունեն վերցնելու միայն այն դիմումները, որոնք ներկայացված են Ռոբերտ Քոչարյանի կողմից, իսկ դատարանի կողմից ներկայացված դիմումին որևէ միջամտություն չեն կարող ունենալ։ Նրա փոխանցմամբ՝ ընթացակարգը ենթադրում է, որ աշխատակարգային նիստով ՍԴ-ն պետք է անդրադառնա դիմումը ետ վերադարձնելու հարցին։

Լրագրողի դիտարկմանը, որ նախկինում պաշտպանները պնդում էին, որ Ռոբերտ Քոչարյանի նկատմամբ քաղաքական հետապնդում է իրականացվում, մինչդեռ՝ բոլորովին վերջերս Ռոբերտ Քոչարյանն ազատ է արձակվել գրավի դիմաց՝ Խուդոյանն արձագանքեց.

«Քաղաքական հետապնդումը ոչ թե կապված է խափանման միջոցի կիրառման կամ չկիրառման հետ, այլ՝ ուղղակիորեն կապված է հենց առաջնային մեղադրանքի հետ, որն առաջադրվել է 2018թ հունիսին, դրա բովանդակությունը, իրավական խոտանները, գործադիր և օրենսդիր իշխանության ներկայացուցիչների անթաքույց մասնակցությունն այս գործին, նույնիսկ վերջին շրջանում ուղղակի հանձնարարականներ են տրվում դատախազներին, թե այս դատական նիստերի դահլիճում վերջիններս ինչ պետք է անեն։ Դա վկայությունն է նրա, որ քաղաքական հետապնդումը շարունակվում է, ուղղակի այդ հետապնդման ճանապարհին գուցե դեմ են առել սկզբունքային ինչ որ դատավորների կայացրած որոշման»։

Աղբյուր` Փաստինֆո