Փաստ ինֆո

Հրայր Թովմասյանը, ինչպես ինքն էր բնորոշել, իր խրամատը որոշեց թողնել Ալվինա Գյուլումյանին, և դա բնորոշ է Հրայր Թովմասյանին։ Այս մասին այսօր լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով հարցին՝ արդյոք որևէ միտում չի տեսնում նրա մեջ, որ Հրայր Թովմասյանն արձակուրդ գնաց։

Անդրադառնալով «Իմ քայլը» խմբակցության ղեկավար Լիլիթ Մակունցի հայտարարությանն առ այն, որ խմբակցությունում կարգապահական հարցեր են քննարկվում՝ Ալեն Սիմոնյանն ասաց. «Կարծում եմ՝ մեր քվեարկություններն ավելի խոսուն են, ելույթներն ավելի խոսուն են։ Մեր թիմի կուռ լինելը շատ մարդկանց երազանքներ, հույսեր գետնով տվեց, և կարծում եմ նման հարցեր քննարկելու կարիք այլևս չունենք ու երկար ժամանակ չենք ունենա։ Ինչ վերաբերում է մեծ կոլեկտիվներին, բոլոր մեծ կոլեկտիվներում հաճախ լինում են կարգապահական հարցեր։ Օրինակ ես նույնիսկ ԱԺ նախագահի կողմից նիստերի դահլիճում նկատողություն եմ ստացել»,-ասաց Աժ փոխխոսնակը։

Անդրադառնալով երեք կուսակցությունների՝ ՀՅԴ, ԲՀԿ և «Հայրենիք», դատախազություն ներկայացրած հանցագործության մասին հաղորդմանը՝ Ալեն Սիմոնյանը նշեց, թե անտարբեր է այդ գործընթացի նկատմամբ. «Երբ հիմա տեսնում եմ այն գործողությունները, որոնք տեղի են ունենում, միանալ, հուշագրեր ստորագրել, ինձ հիշեցնում է այն նույն շրջանը, որ 30 տարի ՀՀ-ում բոլոր ընդդիմություններն այդ նույն շրջանով անցնում, պտտվում, իրար հետ վիճում, լուսանկարվում էին։ Ցավում եմ, որ ուժեր, մարդիկ, որ միգուցե հնարավորություն ունեին կամ կարող են ունենալ այլ ձևով աշխատելու, այլ մարտավարություն ընտրելու, այլ ոչ թե իրենց կողմից վճարված իրականությունը տեսնելով ու հավատալով գործողություն անելով։ Նույն ցիկլի մեջ են ընկնում»,-ասաց Ալեն Սիմոնյանը։

Աղբյուր` Փաստինֆո